ރައްޔިތުންގެ މަޖިލީހުގެ މެޖޯރިޓީ ސަރުކާރަށް ލިބިއްޖެނަމަ ސިޔާސީ މީހުން ވަގުތުން ހައްޔަރުކުރަން ފަށާނެ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
ފައްޔާޒް މިހެން ވިދާޅުވީ، އެމްޑީޕީން މާލޭގައި ރޭ ބޭއްވި ކެމްޕޭނު އިވެންޓެއްގައި ވާހަކަ ދައްކަވަމުންނެވެ.
ރާއްޖޭގެ ކަންކަން މިހާރު އޮތީ ކަންބޮޑުވާ ހިސާބެއްގައި ކަމަށާއި ކުރިން ރާއްޖެ އޮތް ގޮތަށް ރާއްޖެ ބަދަލުވަމުންދާ މަންޒަރު ފެންނަމުންދާ ކަމަށާއި، ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވީ ބޮޑެތި ދޮގުތަކެއް ހަދައިގެންކަން ރައްޔިތުންނަށް މިހާރު އެނގޭ ކަމަށާއި ސަރުކާރުން ދައްކާ ކޮންމެ ވާހަކައެއް އަދި ވައުދެއް ވެގެން ގޮސްފައިވަނީ ދޮގު ވައުދަކަށް ކަމަށް ފައްޔާޒު ވިދާޅުވި އެވެ.
އަދި ސަރުކާރަށް މަޖިލީހުގެ މެޖޯރިޓީ ލިބިއްޖެ ނަމަ ދެން ފެންނާނީ އަނިޔާވެރިކަން ކަމަށާއި އިސާހިތަކު ސިޔާސީ މީހުން ހައްޔަރުކުރަން ފަށާނެ ކަމަށް ފައްޔާޒު ވިދާޅުވި އެވެ.
އެމްޑީޕީ އަކީ އަބަދުވެސް މި ގައުމުގައި އަނިޔާވެރިކަމާ ދެކޮޅަށް، ހެޔޮވެރިކަމެއް ކުރުމަށް މަސައްކަތް ކުރަމުން އަންނަ ޕާޓީއެއް ކަމަށާއި އެމްޑީޕީގެ ދެ ވެރިކަމުގައި ވެސް އެކަން ސާބިތުކޮށްދީފައިވާނެ ކަމަށް ވެސް ފައްޔާޒު ވިދާޅުވި އެވެ.
އެމްޑީޕީން މަޖިލިސް އިންތިހާބުގެ ކެމްޕޭނަށް ގެންގުޅޭ ސްލޯގަންއަކީ “މިސްރާބު ހަމަމަގަށް” އެވެ.
މަޖިލިސް އިންތިހާބު ބޭއްވުމަށް ހަމަޖެހިފައިވަނީ އޭޕްރީލް 21 ގަ އެވެ.
