2028 ވަނަ އަހަރު އެމްޑީޕީން އަލުން އަނބުރާ ވެރިކަމަށް އައުމަށްފަހު އުތުރުތިޅަފަޅަކީ ބޯހިޔާވަހިކަން ފޯރުކޮށްދޭ ތަނަކަަށް ބަދަލުކުރައްވާނެ ކަމަަށްއެމްޑީޕީގެ ޗެއާޕާސަން، ފައްޔާޒް އިސްމާއީލް ވިދާޅުވެއްޖެއެވެ.
ފައްޔާޒް މިހެން ވިދާޅުވީ އެމްޑީޕީން ރޭ މާލޭގައި ބޭއްވި ކެމްޕޭނު އިވެންޓެއްގައި ވާހަކަ ދައްކަވަމުންނެވެ.
ފައްޔާޒް ވިދާޅުވީ އުތުރުތިލަފަޅުން ބިން ހިއްކައިގެން ދެމެހެއްޓެނިވި ގޮތެއްގައި ދަނޑުވެރިކަން ކުރުމަށް ޗައިނާގެ ކުންފުންޏަކާއެކު އެއްބަސްވުން ހެދިނަމަވެސް ޗައިނާގެ ކުންފުންޏަކުން އުތުރުތިޅަފަޅަށް އަންނަނީ ގަސް އިންދަން ނޫން ކަމަށެވެ.
އެތަނުގައި ޗައިނާއިން ކުރާނީ މިލިޓަރީ މަސައްކަތް ކަމަށް ފައްޔާޒު ވިދާޅުވި އެވެ.
އޭނާ ވިދާޅުވީ އުތުރުތިލަފަޅަކީ ރަނގަޅު އިގްތިސާދީ މަސައްކަތްތައް ކުރެވޭނެ ތަނެއް ކަމަށާއި ރައްޔިތުންނަށް ބޯހިޔާވަހިކަން ފޯރުކޮށްދެވޭނެ ރަނގަޅުސަރަހައްދެއް ކަމަށެވެ.
ޗައިނާގެ ނޭވީ އުޅަނދެއް ރާއްޖޭގެ ކަނޑުއަޑި އޮތް ގޮތް ބަލަމުން، ޗާޓު ހަދަމުންދާތާ ތިން މަސްވެފައިވާ ކަމަށާއި ނަމަވެސް ކުރީ ސަރުކާރުން އެފަދަ ކަންކަންކުރީ ވެސް އެއްބަސްވުންތައް ހަދައިގެން ކަމަށާއި މިހާރު އެއްބަސްވުމެއް އޮތްކަން ނުވަތަ ނެތްކަން ވެސް ނޭނގޭ ކަމަށް ފައްޔާޒު ވިދާޅުވިއެވެ.
މީގެ އިތުރުން ފައްޔާޒު ވިދާޅުވީ ޚުދުމުހުތާރު ވެރިކަމަށް ނުގޮސް މި އޮތީ މިހާރު މަޖިލީހުގެ މެޖޯރިޓީ އެމްޑީޕީ އަތުގައި އޮތުމުން ކަމަށާއި، 20 ވަނަ ރައްޔިތުންގެމަޖިލިސް އިންތިޚާބުގައި އެމްޑީޕީއަށް މެޖޯރިޓީ ގެއްލިއްޖެނަމަ 2013 އަށްވުރެ ޚުދުމުހުތާރު ވެރިކަމަކަށް ދާނެ ކަމަށް ފައްޔާޒު ވިދާޅުވިއެވެ.
