ކުރިއަށްއޮތް ރައްޔިތުންގެ މަޖިލީހުގެ އިންތިހާބުގައި އެމްޑީޕީއަށް މެޖޯރިޓީ ލިބިއްޖެނަމަ ސިޔާސީ މަގުސަދުގައި ވަޒީފާތަކުން މީހުން ވަކިކުރުމަކީ ކުށަކަށް ހަދާނެކަމަށް އެމްޑީޕީގެ ޗެއަރޕާސަން ފައްޔާޒު އިސްމާޢިލް ވިދާޅުވެއްޖެއެވެ.
ފައްޔާޒް މިހެން ވިދާޅުވީ އެ ޕާޓީގެ ކެމްޕޭނުގެ ތެރެއިން ކުރީގެ ރައީސް އިބްރާހިމް މުހައްމަދު ސޯލިހުގެ އަރިހުގައި އާރުޑީސީގެ މުވައްޒަފަކަށް ވަޒީފާގެ ބިރު ދެއްކި ވާހަކަ އާއްމު މީހަކު ހިއްސާކުރާ މަންޒަރު ފެންނަ ވީޑިއޯއެއް ހިއްސާކޮށް އެކްސްގައި ކުރެއްވި ޕޯސްޓެއްގައެވެ.
ފައްޔާޒު ވިދާޅުވީ، އެމްޑީޕީން ހިޔާލުފާޅުކުރުމުގެ މިނިވަންކަން ހޯދައިދިނީ ބިރުފަހަނައަޅާ ގޮސްގެން ކަމަށާއި ، އެމްޑީޕީގެ މެންބަރުންނަކީ ދައްކާހާ ބިރަކަށް ސިހޭނެ ބައެއް ނޫންކަން ރައީސް ޑރ. މުޙައްމަދު މުޢިއްޒަށް އެނގިވަޑައި ނުގަންނަވާތީ ހިތާމަކުރައްވާ ކަމަށެވެ.
އަދި ސަރުކާރުގެ ކުންފުނިތަކުގައި ތިބި މުވައްޒަފުންނަށް ވަޒީފާގެ ބިރު ދައްކަމުންދާކަން ފާހަގަ ކުރައްވާ ވިދާޅުވީ، 20 ވަނަ ރައްޔިތުންގެ މަޖިލީހުގެ މެޖޯރިޓީ އެމްޑީޕީއަށް ލިބިއްޖެނަމަ ސިޔާސީ މަގްސަދަށް ވަޒީފާއިން ވަކިކުރުމަކީ ގާނޫނީ ކުށެއް ކަމުގައި ކަނޑައަޅާ ސިވިލް ސާވިސް މުވައްޒަފުންނަށް ލިބިދީފައިވާފަދަ ގާނޫނީ ރައްކާތެރިކަން ދައުލަތުގެ ކުންފުނިތަކުގެ މުވައްޒަފުންނަށްވެސް ކަށަވަރުކޮށްދޭނެކަމަށް ފައްޔާޒު ވިދާޅުވިއެވެ.
