2018 ވަނަ އަހަރު އެމްޑީޕީން ވެރިކަމާ ހަވާލުވިއިރު ޢިއުލާންކުރި މެނިފެސްޓޯ، ވެރިކަން ނިމިގެން ދިޔައިރުވެސް އޮތީ އޮތްތާނގައި ކަމަށާއި އެޕާޓީގެވައުދުތައް ނުފުއްދުނު ކަމަށް ކުރީގެ ރައީސް މުޙައްމަދު ނަޝީދު ރޭ ވިދާޅުވެއްޖެއެވެ.
ނަޝީދު މިހެން ވިދާޅުވީ މަޖިލިސް އިންތިޚާބަށް ޑިމޮކްރެޓްސްގެ ކެންޑިޑޭޓުންނަށް ތާޢީދު ހޯއްދެވުމަށް ރޭ ބޭއްވި ކެމްޕޭން ޖަލްސާގައި ވާހަކަފުޅުދައްކަވަމުންނެވެ.
ނަޝީދު ވިދާޅުވީ އެމްޑީޕީއަށް މެނިފެސްޓޯގައި ހުރި ވައުދުތައް ނުފުއްދުނު ކަމަށާއި އެހެން ކަމުން ކުރިއަށް އޮތް މަޖިލިސް އިންތިޚާބުގައި އެޕާޓީއަށް ވޯޓްދޭންޖެހޭ އެއްވެސް ސަބަބެއް ނެތް ކަމަށެވެ.
ރައީސް ނަޝީދު ވިދާޅުވީ ކުރީގެ ރައީސް ސޯލިހްގެ ސަރުކާރަށް އެމްއެމްޕީއާރުސީގެ ޚިޔާނާތުގެ މައްސަލަ ވެސް ނުބެލުނު ކަމަށެވެ. އަދި އޭގެ ބަދަލުގައިހިނގާފައިވަނީ ވައްކަން ކަމަށާއި އެމްޑީޕީގެ ސަރުކާރުގައި އުފެދުނީ ވައްކަމުގެ ނެޓްވޯކެއް ކަމަށެވެ.
އަދި މީގެ އިތުރުން
ބޯހިޔާވަހިކަމުގެ ވައުދު ވެސް އެމްޑީޕީއަށް ނުފުއްދުނު ކަމަށާއި ވެރިކަން ނިމެން ގާތްވުމުން ރައްޔިތުންނަށް ގޯއްޗާއި ފުލެޓް ދިނުމުގެ ނަމުގައި ހިންގީ ބޮޑުއޮޅުވާލުމެއް ކަމަށެެވެ.
19 ވަނަ މަޖިލިސް އުފެދިގެން އައީ ދިވެހި ދައުލަތުގެ ދަރަނި އަލުން އަނބުރާ އެކުލަވާލާނެކަމުގެ ވައުދާއެކު ކަމަށާއި އެހެން ނަމަވެސް އެމްޑީޕީން ކަން ކުރީމެނިފެސްޓޯއާ ދިމާ އިދިކޮޅަށް ކަމަށްވެސް ރައީސް ނަޝީދު ވިދާޅުވިއެވެ. އެމްޑީޕީގެ ސަރުކާރުގައި ގައުމުގެ އުފެއްދުންތެރިކަން ދިޔައީ ދަށައް ކަމަށް ވެސް ނަޝީދު ވަނީ ވިދާޅުވެފައިއެވެ.
