ޕްރޮސެކިއުޓަރު ޖެނެރަލްގެ މަގާމުން ހުސައިން ޝަމީމް އިސްތިއުފާދެއްވި ކަމުގެ ސިޓީ ރައްޔިތުންގެ މަޖިލީހަށް ނުލިބޭ ކަމަށް ބުނެ މަޖިލީހުން ޝަމީމް ޕީޖީގެ މަގާމުން ވަކިކޮށްފި އެވެ.
ޝަމީމް ގާނޫނުއަސާސީ އާއި ޚިލާފަށް އަމަލުކުރައްވަމުން އަންނަ ކަމަށް ބުނެ، އޭނާ އެމަގާމުން ވަކި ކުރުމަށް މިރޭ ރައްޔިތުންގެ މަޖިލީހުގައި ޖަލްސާއެއް ކުރިއަށް ދިޔަ ވަގުތުގައި ޕްރޮސިކުޓާ ޖެނެރަލްގެ އޮފީހުން ވަނީ ޝަމީމް ޕީޖީގެ މަގާމުން އިސްތިއުފާ ދެއްވިކަމަށް ބުނެފައެވެ. ޕީޖީ އިން ޝަމީމްގެ އިސްތިއުފާގެ ސިޓީ ރައީސް އޮފީހަށް މެއިލްކުރައްވާފައިވާ ކަން ވެސް ކަށަވަރު ކޮށްދެއްވާފަ އެވެ.
އެހެންނަމަވެސް މިރޭގެ މަޖިލިސް ޖަލްސާގެ ތެރެއިން އެމްޑީޕީގެ ޕާލިމެންޓްރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލާއި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވަނީ ނިޒާމީ ނުކުތާއެއް ނަންގަވާ މީޑިއާ އާއި ހަވާލާދީ ޝަމީމް އިސްތިއުފާ ދެއްވާފައިވާކަން މަޖިލީހުގެ ތަޅުމުގައި ހާމަކޮށްފަ އެވެ. މީގެ އިތުރުން ވަގުތު ވައިކަރަދޫ ދާއިރާގެ މެންބަރު އަދި އެމްޑީޕީގެ ޕާލިމެންޓްރީ ގްރޫޕްގެ ޑެޕިއުޓީ ލީޑަރު ހުސައިން ޒިޔާދު ވެސް ވަނީ އެކަން ރިޔާސަތުގެ ސަމާލުކަމަށް ގެނެސްފަ އެވެ.
އެހެންނަމަވެސް މިރޭގެ ރިޔާސަތު ބެލެހެއްޓެވި މަޖިލީހުގެ ނައިބު ރައީސް އަހްމަދު ނާޒިމް ވިދާޅުވީ، ރައީސް ޑރ. މުހައްމަދު މުއިއްޒަށް ޝަމީމް އިސްތިއުފާގެ ސިޓީ ހުށަހެޅުއްވިކަން ރައީސް އޮފީހުން މަޖިލީހުގެ އިދާރާއަށް ނާންގާހާ ހިނދަކު ޖަލްސާ ކުރިއަށް ދާނެ ކަމަށާއި މި މައްސަލައިގެ ވޯޓާ ހަމައަށް ދިޔައިރު ވެސް، ރައީސަށް ޝަމީމްގެ ސިޓީ ލިބިފައިވާކަން ރައީސް އޮފީހުން މަޖިލީހުގެ އިދާރާ އަށް އަންގާފައިނުވާ ކަމަށެވެ.
އެގޮތުން ޝަމީމް ޕީޖީގެ މަގާމުން ވަކި ކުރުމަށް ރިޔާސަތުން ވޯޓަށް އެހުމުން ޝަމީމް ވަކިކުރަން ފެންނަ ކަމަށް ވޯޓުގައި ބައިވެރިވި 75 މެންބަރުންގެ ތެރެއިން 64 މެންބަރުން ވަނީ ވޯޓު ދެއްވާފައެވެ. ޝަމީމް ވަކިކުރަން ނުފެންނަ ކަމަށް ނުވަ މެންބަރުން ވޯޓު ދެއްވާފައިވާއިރު، އެއް މެންބަރަކު ވަކި ކޮޅަކަށް ނުޖެހެ އެވެ.
