ޗައިނާގެ ވެންޒޯ މެޑިކަލް ޔުނިވަރސިޓީން ކުރި އައު ދިރާސާއަކުން ދައްކާގޮތުގައި ރޭގަނޑު 7 ގަޑިއިރަށްވުރެ ގިނައިރު ނިދާ މީހުންގެ ސިއްހަތު، އުމުރުން ދުވަސްވާއިރު ރަނގަޅު ކަމަށް ވަނީ ފާހަގަކުރެވިފައެވެ.
މި ދިރާސާގައި 45 އަހަރުން މަތީގެ 3،306 މީހުންގެ ނިދުމުގެ އާދަތައް 2011 އިން 2015 އަށް ބަލާ، 2020 ގައި އެ މީހުންގެ ސިއްހީ ހާލަތު ވަނީ ދިރާސާކޮށްފައެވެ. މި ދިރާސާގެ ނަތީޖާއިން ދައްކާގޮތުގައި ހަމައެކަނި 13.8 އިންސައްތަ (455 މީހުން) ވަނީ ދުޅަހެޔޮ ސިއްހަތެއްގައި އުމުރުން ދުވަސްވުމުގެ ހުރިހާ މިންގަނޑުތަކެއް ފުރިހަމަކޮށްފައެވެ.
ދިރާސާގައި ބައިވެރިން ވަނީ ނިދުމުގެ އާދަތަކަށް ބަލާ 5 ގްރޫޕަކަށް ބަހާލެވިފައެވެ. އެއީ ގިނައިރު ނިދާ ގްރޫޕް (8-9 ގަޑިއިރު)، އާންމު މިންވަރަށް ނިދާ ގްރޫޕް (7-8 ގަޑިއިރު)، ނިދާ ވަގުތު މަދުވަމުންދާ ގްރޫޕް، ނިދާ ވަގުތު އިތުރުވަމުންދާ ގްރޫޕް، އަދި މަދުން ނިދާ ގްރޫޕް (5-6 ގަޑިއިރު) އެވެ.
ގިނައިރު އަދި އާންމު މިންވަރަށް ނިދާ ގްރޫޕްތަކުގެ ބައިވެރިންގެ ތެރެއިން 17.1 އަދި 18.1 އިންސައްތަ މީހުން ވަނީ ދުޅަހެޔޮ ސިއްހަތެއްގައި އުމުރުން ދުވަސްވެފައެވެ. އެހެންނަމަވެސް އެހެން ގްރޫޕްތަކުގައި މި ނިސްބަތް ވަނީ 8.8 އިން 10.6 އިންސައްތައަށް ދަށްވެފައެވެ.
މި ދިރާސާއިން ދައްކާގޮތުގައި ގަވާއިދުން އެކަށީގެންވާ ވަގުތު ނިދުމަކީ ދުޅަހެޔޮ ސިއްހަތެއްގައި އުމުރުން ދުވަސްވުމަށް ވަރަށް މުހިންމު ކަމެކެވެ. އަދި މިއީ ހަމައެކަނި އުމުރާ ގުޅުންހުރި ބަދަލުތަކެއް ނޫންކަން ދިރާސާއިން ވަނީ ސާބިތުކޮށްދީފައެވެ.
