ޕީޕީއެމްގެ ފިކުރަކީ ވަކި މީހެއްގެ މިލްކެއް ނޫން ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.
އަދުރޭ މިހެން ވިދާޅުވީ މިއަދު އެކްސްގައި ކުރެއްވި ޕޯސްޓެއްގައިއެވެ.
މި ޕޯސްޓްގައި އަދުރޭ ވިދާޅުވީ ޕީޕީއެމްގެ ފިކުރަކީ ވަކި މީހެއްގެ މިލްކެއް ނޫން ކަމަށާއި އެއީ ގައުމިއްޔަތުގެ ފިކުރު ކަމަށެވެ. އަބަދުވެސް އެ ފިކުރު އޮންނާނީ ގައުމާރައްޔިތުންގެ ހައްގުގައި މަސައްކަތްކުރާ ބައެއްގެ އަތްމަތީގައި ކަމަށެވެ.
ޕީޕީއެމް/ޕީއެންސީ ކޯލިޝަނުގެ ލީޑަރަކަށް ކުރިން ހުންނެވީ، ކުރީގެ ރައީސް އަބްދުﷲ ޔާމީން ކަމަށްވާއިރު އެމަނިކުފާނު ޕީޕީއެމުން ވަކިވެވަޑައިގެންނެވީ އެޕާޓީގެ ލީޑާޝިޕުން އެމަނިކުފާނު އެއްފަރާތް ކޮށްފައިވާ ކަމަށް ބުނުއްވާފައިވެއެވެ.
ޕީޕީއެމުން ވަކިވެވަޑައިގެންނެވުމަށްފަހު ޔާމީން މިހާރު ގެންދަވަނީ ޕީޕަލްސް ނެޝަނަލް ފްރޮންޓް (ޕީއެންއެފް)ގެ ނަމުގައި އާ ސިޔާސީ ޕާޓީއެއް އުފައްދަވަންމަސައްކަތް ކުރައްވަމުންނެވެ.
ވެރިކަމުގެ ފުރަތަމަ ދުވަހު ޔާމީން މިނިވަން ކުރައްވާނެ ކަމަށް ރިޔާސީ އިންތިހާބުގެ ތެރޭގައި ރައީސް މުއިއްޒު ވަނީ ވިދާޅުވެފަ އެވެ.
ޔާމީން މިވަގުތު ހުންނެވީ ގޭ ބަންދުގައި ކަމަށްވާއިރު އެމަނިކުފާނުގެ ބަންދަށް އެންމެފަހުން ލުއިތަކެއް ދިނީ ވެސް ކުރީގެ ސަރުކާރުންނެވެ.
