އަންނަ މަހުގެ 21 ގައި ބާއްވާ ރައްޔިތުންގެ މަޖިލިހުގެ އިންތިހާބުގައި ގއ. ދާންދޫ ދާއިރާ އަށް ވާދަކުރައްވާ ޖުމްހޫރީ ޕާޓީ (ޖޭޕީ)ގެ ކެންޑިޑޭޓު ނިޝާމާ މުހައްމަދު އެ ޓިކެޓް ދޫކޮށްލައްވައި، ސަރުކާރު ކޯލިޝަންގެ ކެންޑިޑޭޓު މުހައްމަދު ފަޒީލަށް ތާއީދު ކުރައްވަން ނިންމަވައިފި އެވެ.
ރޭ ނިޝާމާ ކުރެއްވި ޕޯސްޓެއްގައި ވަނީ ދާންދޫ ދާއިރާގެ ގޮނޑި އަށް ވާދަކުރައްވަން ޖޭޕީގެ ލީޑަރު ގާސިމް އިބްރާހިމް އޭނާ އަށް ދެއްވި ފުރުސަތަށް ޝުކުރު އަދާކުރައްވައިފަ އެވެ.
މަޖިލިސް އިންތިހާބާ ދެމެދު އޮތް މަދު ދުވަސްކޮޅުގެ ތެރޭގައި ނުކުމެވަޑައިގެން ކުރެއްވި މަސައްކަތުގައި ރައްޔިތުންގެ ލޯތްބާއި އިހުތިރާމާއި އެއްބާރުލުން އޭނާ އަށް ލިބުނު ކަމަށެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ޑެޕިއުޓީ މިނިސްޓަރުކަން ކުރެއްވި ނިޝާމާ ވިދާޅުވީ، އިންތިހާބެއް ކާމިޔާބު ކުރުމަށް ހިތްވަރާ އެކު ކުރާ މަސައްކަތެއްގެ އިތުރަށް ވަރަށް ބޮޑެތި ހަރަދުތައް ކެންޑިޑޭޓު ކުރަން ޖެހޭ ކަމަށެވެ.
ނިޝާމާ ވިދާޅުވީ، މި ހާލަތުގައި އެންމެ ރަނގަޅު ގޮތް ކަމަށް އޭނާ އަށް ވިސްނިވަޑައިގަތީ، މަޖިލިސް އިންތިހާބުގައި ދާންދޫ ދާއިރާގައި ސަރުކާރު ތަމްސީލު ކުރާ ޕާޓީގެ ކެންޑިޑޭޓަށް ތާއީދު ކުރެއްވުން ކަމަށެވެ.
ދާންދޫ ދާއިރާގެ ޓިކެޓް ލިބުނު ކެންޑިޑޭޓަކު ޓިކެޓް ދޫކޮށް، ސަރުކާރު ކެންޑިޑޭޓް ފަހަތަށް އަރާފައި ވާއިރު މައްޗަންގޮޅި މެދުދާއިރާގެ ޕީއެންސީގެ ޓިކެޓުގައި ވާދަކުރުމަށް ޕްރައިމަރީ ކާމިޔާބުކުރި މުހައްމަދު އަބްދުލް ގާދިރު (ކޫކު) ވަނީ އެ ދާއިރާ އަށް އަމިއްލަ ގޮތުން ވާދަކުރާ ކެންޑިޑޭޓް އަހުމަދު ޒަމީރަށް ތާއީދު ކުރަން ރޭ ނިންމައިފަ އެވެ.
