އިންތިހާބުވި ޕާޓީ ނޫން އެހެން ޕާޓީއަކަށް ބަދަލުވުމުން ގޮނޑި ގެއްލެން ޖެހޭނެކަމަށް ގިނަ ބަޔަކު ގަބޫލުކުރާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ ސާވޭގެ ނަތީޖާގައި ބުނެފިއެވެ.
މި ހިނގާ އޭޕްރީލް މަހު 21 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބާ ބެހޭ ގޮތުން މައުލޫމާތު އެއްކޮށް، އިންތިހާބާ ގުޅުން ހުރި ނިޒާމީ މައްސަލަތަކާ މެދު އާންމުންގެ ހިޔާލު ހުރި ގޮތް ހޯދުމުގެ ބޭނުމުގައި އެޗްއާރުސީއެމްގެ ފަރާތުން ސާވޭއެއް ކުރިއަށް ގެންގޮސްފައި ވާއިރު، މި ސާރވޭގައި ރާއްޖޭގެ އެކި ހިސާބުތަކުން އެކި އުމުރުފުރާގެ ދެ ޖިންސުގެ 1،000 އަށްވުރެ ގިނަ މީހުން ބައިވެރި ވެފައިވެއެވެ
ސާވޭގެ ނާތީޖާ އެޗްްއާރުސީއެމުން މިއަދު އާންމުކޮށްފައިވާ އިރު، ނާތީޖާގައިވާ ގޮތުން ސާވޭގައި ބައިވެރިވި މީހުންގެ ތެރެއިން 73 ޕަސަންޓު މީހުން ގަބޫލުކުރަނީ ޕާޓީ ބަދަލުކުރާ މަޖިލިސް މެމްބަރުންގެ ގޮނޑި ގެއްލެން ޖެހޭނެ ކަމަށެވެ.
ޕާޓީ ބަދަލުކުރުމުން ގޮނޑި ގެއްލެންޖެހޭތޯ ސާވޭގައި ކުރި ސުވާލުގެ އޮޕްޝަންތައް:
- ވަރަށް ބޮޑަށް ގަބޫލުކުރަން: %47
- ގަބޫލުކުރަން: %26
- މެދުމިން: %11
- ގަބޫލެއް ނުކުރަން: %13
- އެއްވެސް ވަރަކަށް ގަބޫލެއް ނުކުރަން: %3
ޕާޓީ ބަދަލުކުރުމުން ގޮނޑި ގެއްލެންޖެހޭނެ ކަމަށް ސާވޭގެ ބައިވެރިން ގަބޫލުކުރާނީ، އެގޮތަށް ޕާޓީ ބަދަލުކުރާ މެމްބަރުންނަށް ސިޔާސީ ފަރާތްތަކާއި ނޫސްވެރިންގެ ފަރާތުން ކޮރަޕްޝަންގެ ތުހުމަތު ކޮށްފައިވުމާއި މިފަހުން އެމްޑީޕީގެ 13 މެމްބަރަކު އެހެން ޕާޓީއަކާ ގުޅިފައިވާތީއެވެ.
ސާވޭގައި ބައިވެރިވި މީހުންގެ ތެރެއިން 68 ޕަސެންޓް މީހުން މަޖިލިސް މެމްބަރުންގެ އަދަދު މަދުކުރުމަށް ތާއީދުކޮށްފައި ވާއިރު، 27 ޕަސެންޓް މީހުން މިހާރު ތިބި މެމްބަރުންގެ އަދަދާ މެދު ހިތްހަމަޖެހެއެވެ. އަދި މިހާރަށްވުރެ މެމްބަރުންގެ އަދަދު އިތުރުކުރަން ފެންނަކަމަށް ހަތަރު އިންސައްތަ މީހުން ފާހަގަކޮށްފައިވެއެވެ.
