އާދީއްތަ ދުވަހު ބޭއްވި 20 ވަނަ ރައްޔިތުންގެ މަޖިލީހުގެ އިންތިހާބަކީ އިންތިޒާމުތައް ފުރިހަމަ އިންތިހާބެއްކަމަށް ބައިނަލްއަގުވާމީ އޮބްޒާވަރުން ބުނެފިއެވެ.
އިންތިހާބުގެ ކަންކަން ދިޔަގޮތާއި ގުޅޭގޮތުން ބޭއްވި ނޫސްވެރިންގެ ބައްދަލުވުމެއްގައި ބައިނަލްއަގުވާމީ އޮބްޒާވަރުންގެ ޓީމުގެ ބޭފުޅުން ދެއްކެވި ވާހަކައިގައި، މި އިންތިހާބުގެ ކަންކަން އިލެކްޝަންސް ކޮމިޝަނުން އިންތިޒާމުކޮށްފައިވާލެއް ފުރިހަމަކަން ފާހަގަކޮށްފައިވެއެވެ.
އެފަރާތުން ބުނެފައިވަނީ އެންމެ ކުދިކުދި ކަންކަމަށް ވެސް ސަމާލުކަން ދީފައިވާ މިންވަރާމެދު ވަރަށް ބޮޑަށް ހިތްހަމަޖެހޭކަމަށާއި އެކަމުން ފެނިގެންދިޔައީ އިންތިހާބުގެ ކަންކަމަށް އިލެކްޝަންސް ކޮމިޝަން ތައްޔާރުވެފައިވާ މިންވަރުކަމަށެވެ.
މީގެ އިތުރުން، އިންތިހާބު ކުރިއަށްދިޔައިރު އިންތިހާބީ މައި މަރުކަޒުގައި މަސައްކަތްތައް ރާވާލައިވާ ގޮތާއި ގުޅޭގޮތުން އޮބްޒާވަރުން ތައުރީފު ކުރައްވާފައި ވާއިރު، ލައިވްކޮށް ނަތީޖާ ބެލޭގޮތަށް އެކަން އިންތިޒާމު ކޮށްފައިވުމާއި، މުޅި އިންތިހާބުގެ ކަންކަން ވަގުތުން ފެންނަގޮތަށް ޒަމާނީ ގޮތްގޮތަށް އެ ތަނުގައި ކަންކަން އިންތިޒާމުކޮށްފައިވާކަންވެސް އެބޭފުޅުންވަނީ ފާހަގަ ކުރައްވާފައިއެވެ.
