އާދީއްތަ ދުވަހު ބޭއްވުނު ރައްޔިތުންގެ މަޖިލީހުގެ އިންތިހާބުގައި ނައިފަރު ދާއިރާއަށް އަމިއްލަގޮތުން ވާދަކުރައްވާ، އިންތިޚާބު ކާމިޔާބުކުރެއްވި ޔާސީން އަބްދުﷲ މިއަދު ސަރުކާރު ހިންގާ ޕީއެންސީއަށް ސޮއިކުރައްވައިފިއެވެ.
ޔާސީން އަމިއްލަގޮތުން އިންތިޚާބު ކާމިޔާބު ކުރެއްވީ ސަރުކާރު ހިންގާ ޕީއެންސީގެ ކެންޑިޑޭޓު ހައްސާން އަލިފުޅު (ބާސް)އާ ވާދަކޮށްގެންނެވެ.
ނައިފަރު ދާއިރާގެ ގޮނޑި ޔާސީން ކަށަވަރުކުރެއްވީ 1،038 ވޯޓާ އެކުއެވެ. ޕީއެންސީގެ ކެންޑިޑޭޓު ބާސްއަށް ލިބިފައިވަނީ 880 ވޯޓެވެ.
ޔާސީން މިހާރު ވެސް ހުންނެވީ ޕީޕީއެމްގެ މެންބަރެއްގެ ގޮތުގައި ޅ. އަތޮޅު ކައުންސިލްގެ ރައީސްކަމުގައިއެވެ.
އަމިއްލަގޮތުން އިންތިޚާބުވީ މެންބަރު ޔާސީން މިއަދު ޕީއެންސީއަށް ސޮއިކޮށްފައިވާއިރު، މެންބަރުން ޕާޓީ ބަދަލުކޮށްފި ނަމަ، މެންބަރުކަމުން އިސްތިއުފާ ދޭންވާނެ ކަމަށް ބުނެ އެމްޑީޕީގެ މެޖޯރިޓީން އޮތީ އެންޓި ޑިފެކްޝަން ގާނޫނެއް ފާސްކޮށްފައެވެ. އެ ގާނޫނު ރައީސް ޑރ. މުހައްމަދު މުއިއްޒު ވަނީ ތަސްދީޤު ވެސް ކުރައްވައިފައެވެ.
