މަޖިލިސް އިންތިހާބުގައި ފުވައްމުލަކު ދެކުނު ދާއިރާއަށް ވާދަކުރެއްވި ނަޒުރާ ނަސީމް (ނަޒޫ) އަށް ގޮނޑި ގެއްލުނީ އޭނާގެ ބޭބެ އަދި ކުރީގެ ނައިބު ރައީސް ފައިސަލް ނަސީމުގެ ސަބަބުން ކަމަށް ނަޒޫގެ ފިރިކަލުން އަހުމަދު މަހުލޫފު ކުރެއްވި ތުހުމަތު ފައިސަލް މިއަދު ދޮގުކުރައްވައިފި އެވެ.
އެކަން ދޮގު ކުރައްވާ ފައިސަލް ވިދާޅުވީ، ރައްޔިތުންގެ މަޖިލީހުގެ އިންތިހާބުގައި އޭނާ ކުރެއްވީ ހަމައެކަނި ކެމްޕެއިން ކަމަށާއި އެ މަސައްކަތް ކުރެއްވީ އެމްޑީޕީން އެދުނު ގޮތަށް ކަމަށެވެ.
މީގެ އިތުރުން ފައިސަލް ވިދާޅުވީ، މަހުލޫފު ކުރައްވާ ތުހުމަތަކީ އެއްވެސް ހަގީގަތެއް އޮތް ކަމެއް ނޫން ކަމަށާއި އެކަމާ ދޭތެރޭ ވިދާޅުވާނެ އެހެން އެއްވެސް ވާހަކައެއް ނެތް ކަމަށެވެ.
އަދި ނަޒޫއަށް ކެމްޕެއިން ކުރައްވަން އެ ދާއިރާއަށް ވަޑައިނުގެންނެވީ އެގޮތަށް އެދިވަޑައިގެންފައި ނުވާތީ އާއި ވަޑައިގަންނަވަންވީ ތަންތަން ކަނޑައެޅީ ޕާޓީން ކަމަށް ވާތީ ކަމަށެވެ.
ނަޒުރާއަށް ފައިސަލް އެންޓި-ކެމްޕެއިން ކުރެއްވި ކަމަށް މަހުލޫފު އެންމެ ފުރަތަމަ ތުހުމަތު ކުރެއްވީ އެމްޑީޕީގެ އިސްވެރިން ތިބި ވަޓްސްއެޕް ގްރޫޕެއްގަ އެވެ.
އެ ހަބަރު ނޫހަކުން ރިޕޯޓު ކުރުމާ ގުޅިގެން މަހުލޫފު ވަނީ އެ ހަބަރު އޭނާގެ ރަސްމީ އެކްސް އެކައުންޓުގައި ހިއްސާކުރައްވައި، ބަލި ގަބޫލު ކުރި ނަމަވެސް މިއީ ކަން ހިނގި ގޮތް ކަމަށް ވިދާޅުވެފަ އެވެ.
