އިއްޔެ ކުރިއަށް ދިޔަ ޕީޕީއެމް/ޕީއެންސީ ޕްރައިމަރީގައި ބައެއް ދާއިރާތަކުގެ ވޯޓުލާ މަރުކަޒުގައި ހަމަނުޖެހުން ބޮޑުވެ، ބައެއް ދާރާތަކުގެ ވޯޓު ފޮށީގައި ވޯޓު ކަރުދާސް ގިނަ ވެއްޖެ އެވެ.
ކުރިޔަށް އޮތް ރައްޔިތުންގެ މަޖިލިސް އިންތިހާބުގައި ޕީޕީއެމް/ޕީއެންސީ ކޯލިޝަނުން ވާދަކުރާ ކެންޑިޑޭޓުން ހޮވުމަށް ބޭއްވި ޕްރައިމަރީގައި އެކި ދާއިރާ ތަކުގެ ވޯޓުލާ މަރުކަޒުތަކުގައި ވަނީ ހަމަނުޖެހުން ހިނގާފަ އެވެ. އެގޮތުން ހުޅުމާލޭ ދެކުނު ދާއިރާގެ ވޯޓުލުން ކުރިއަށް ދަނިކޮށް އެ ތަނަށް އެހެން ދާއިރާއެއްގެ ވޯޓު ކަރުދާސް ގެނެސް މީހުން ލައްވާ ވޯޓުލަމުންދާ ކަމަށް ބުނެ އެ ދާއިރާ އަށް ވާދަކުރައްވާ ކެންޑިޑޭޓު ދުންޔާ މައުމޫން ވަނީ މީސް މީޑިއާގައި ކަންބޮޑުވުން ފާޅު ކޮށްފަ އެވެ. އަދި ގައްދޫ ދާއިރާގެ މާލޭ ފޮށީގެ ވޯޓު ގުނި އިރު ވޯޓު ފޮށީގައި 57 ވޯޓު ކަރުދާސް ގިނަވުމުން އެ ސަރަހައްދު ވެސް ވަނީ ވަރަށް ބޮޑަށް ހޫނު ވެފަ އެވެ.
ގައްދޫ ދާއިރާގެ އިތުރުން އައްޑޫ މަރަދޫ ދާއިރާގެ މާލޭ ފޮށީގައިވެސް ނިއުސްލެބަށް މައުލޫމާތު ލިބުނުގޮތުގައި 41 ގަނޑު ވަނީ އިތުރުވެފަ އެވެ. މީގެއިތުރުން ވޯޓު ގުނަމުން ދިޔަ ގަޑީގައި މެދު ހެންވޭރު ދާއިރާގެ ވޯޓު ފޮށީގެ ވޯޓު ކަރުދާސް ބަޔަކު ވަނީ ވީދާލާފަ އެވެ. އަދި މި ދާއިރާ އާއި، ހެންވޭރު ދެކުނު ދާއިރާގެ ވޯޓު ލުން ކުރިއަށް ދިޔަ ގަޑީގައި ހަމަނުޖެހުން ހިނގާ ވޯޓުލުން ވަނީ މެދުކަނޑާލައިފަ އެވެ.
ވެރިކަން ކުރާ ކޯލިޝަންގެ ޕްރައިމަރީގައި ގިނަ މައްސަލަތަކެއް ހުރި ކަމަށް އެ ކޯލިޝަނަށް ނިސްބަތްވާ ފަރާތްތަކުން ބުނަމުންދާ އިރު، ޕްރައިމަރީއަށް ވޯޓު ލެވޭ މީހުންގެ ލިސްޓު އާންމުކޮށްފައި ވަނީ ހުކުރު ދުވަހުގެ ރެ އެވެ. އަދި ލިސްޓުގައި ބައެއް މީހުންގެ ނަން އުނިކޮށް، ޕާޓީގެ ދަފްތަރުގައި ނެތް މީހުންގެ ނަން ހިމަނާފައިވާކަމަށް ގިނަ ބަޔަކު ދަނީ ބުނަމުންނެވެ.
73 ދާއިރާގެއްގެ ޕްރައިމަރީ މިއަދު ނިންމާލި އިރު، ޕްރައިމަރީ އަކާއި ނުލާ 13 ދާއިރާއެއްގެ ޓިކެޓް އެކި ފަރާތްތަކަށް ވަނީ ކަށަވަރުކުރެވިފަ އެވެ.
