ދަރަނީގެ ބޮޑެތި މައްސަލަތަކެއްގެ ތެރޭގައި އޮތް ސަރުކާރުގެ ކުންފުނި، ފެނަކަ ކޯޕަރޭޝަންގެ މައްޗަށް އިތުރު 35 މިލިއަން ރުފިޔާގެ ހުކުމެއް ކޮށްފި އެވެ.
ސިވިލް ކޯޓުން އިއްޔެ ހުކުމްކޮށްފައިވަނީ ޕަވާ އިންޖިނިއަރިން ކިޔާ ކުންފުންޏަކަށް ފެނަކަ އިން ދައްކަން ޖެހިފައިވާ ފައިސާތަކެއް ނުދައްކާ އޮތުމުގެސަބަބުން އެ ކުންފުނިން ދައުވާކުރުމުންނެވެ.
ކުންފުނީގެ ފަރާތުން އެދިފައިވަނީ ފެނަކައަށް ސަޕްލައިކޮށްދިން ޖަނަރޭޓަރުތަކާއި ކޭބަލްތަކަށް ދައްކަން ޖެހޭ 30.43 މިލިއަން ރުފިޔާ ނަގައިދިނުމަށާއި އެކުންފުނީގެ ފިހާރައިން ފެނަކައިން ނެގި މުދަލަށްވާ 4.8 މިލިއަން ރުފިޔާ ނަގައިދިނުމަށެވެ.
މި މައްސަލައާއި ގުޅިގެން ސިވިލް ކޯޓުން ކަނޑައެޅީ ދައުވާގައި ޕަވާ އިންޖިނިއަރިން އިން ބުނާ ފައިސާތަކަކީ ފެނަކައިން ދައްކަން ޖެހޭ ފައިސާތަކެއްކަންސާބިތުވާ ކަމަށެވެ. އެހެން ކަމުން އެ ފައިސާ އެއް މަސް ތެރޭ އެކީ އެއް ފަހަރާ ދައްކާ ހަލާސްކުރަން ފެނަކައިގެ މައްޗަށް ކޯޓުން އަމުރުކުރި އެވެ.
