ގެދޮރުވެރިޔާ ސްކީމުގެ ދަށުން އުސޫލާ ހިލާފަށް ޕޮއިންޓް ދީފައިވާ ފޯމުތައް އަލުން މުރާޖައާކޮށް ފްލެޓް ލިބޭ މީހުންނަށް ފްލެޓްތައް ދިނުމުގެ ހުއްދަ އޭސީސީން މިއަދު ދީފިއެވެ.
ނިއުސްލެބަށް މަޢުލޫމާތު ލިބިފައިވާގޮތުގައި އެންޓިކޮރަޕްޝަން ކޮމިޝަނުން މިއަދު ހައުސިން މިނިސްޓްރީއަށް ގެދޮރުވެރިޔާ ސްކީމުގެ ފްލެޓްތައް ލިބުނު މީހުންނަށް ފްލެޓްތައް ދިނުމުގެ މަސައްކަތްކުރަން ފެށުމަށް ވަނީ ހުއްދަދީފައެވެ.
ގެދޮރުވެރިޔާ ސްކީމްގެ ދަށުން ދޭން އިއުލާންކުރި 4،000 ފްލެޓްތަކަށް އެދުނު މީހުންނަށް ޕޮއިންޓް ދިނުމުގައި ސުވާލުއުފެދޭ ކޮރަޕްޝަނަށް މަގުފަހިވާ ކަންކަން ހުރިކަމަށް އޭސީސީގައި މައްސަލަ ޖެއްސުމުން އެކަންކަން ބެލުމަށް އޭސީސީން ވަނީ ފްލެޓް ދިނުމުގެ މަސައްކަތް ހުއްޓުވާފައެވެ.
މިދިޔަ ނޮވެންބަރމަހު ފްލެޓް ދިނުން ހުއްޓުވާފައި އޮތުމުން ފްލެޓަށް އެދުނު މީހުން ވަނީ ނުރުހުންފާޅުކޮށް، ފްލެޓް އަވަހަށް ދިނުމަށް އެދި އަޑުއުފުލާފައެވެ.
އޭސީސީން ހައުސިންގ މިނިސްޓްރީއަށް އަންގާފައިވަނީ އަސާސީ އުސޫލުތަކާއި ޝަރުތުތަކާ އެއްގޮތަށް ޕޮއިންޓް ދީފައިވާ ފޯމުތަކަށް ބަދަލު ނާންނާނެހެން ހަމައެކަނި މައްސަލަ ހުރި ފޯމުތައް މުރާޖައާކުރުމަށާއި، މުރާޖައާކުރުމުގައި އުސޫލުގައި ސީދާ ކަނޑައެޅިގެން ވަކި ގޮތެއް ބަޔާން ނުކުރާ ކަންކަމާ މެދު ގޮތްތައް ކަނޑައެޅުމަށް އަދި ފްލެޓް ލިސްޓު މުރާޖައާކުރުމުގައި ތަފާތުނުކޮށް އެއް މިންގަނޑަކުން އަމަލުކުރުމަށެވެ.
ހުޅުމާލެ ފޭސް 2 ގައި ޢިމާރާތްކުަމުންދާ ގެދޮރުވެރިޔާ ސްކީމްގެ ފްލެޓްތަކުން ބައެއް ފްލެޓްތައް މިހާރު ނިމެން ގާތްވެއްޖެއެވެ.
