މާރޗް 17 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުން މަޖިލިސް އިންތިހާބުގައި ޑިމޮކްރެޓްސްގެ ފަރާތުން ވާދަކުރާނެ ކެންޑިޑޭޓުން ކަނޑައެޅުމަށް ބޭއްވި ޕްރައިމަރީ މަޖިލިހުގެ މަޑަވެލި ދާއިރާގެ މެމްބަރު ހުސެއިން ފިރުޝާން އާއި މާލެ ސިޓީ ކައުންސިލްގެ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފްފާތިހް ކާމިޔާބު ކުރައްވައިފިއެވެ.
ޑިމޮކްރެޓްސްގެ ޕްރައިމަރީގައި ފިރުޝާން ކުރިމަތިލެއްވީ ހުޅުމާލެ ދެކުނު ދާއިރާއަށެވެ.
ހުޅުމާލެ ދެކުނު ދާއިރާގެ ޕްރައިމަރީގެ ނަތީޖާ:
- ހަސަން އަގީލް (ހުޅުމާލެ ހަވަރު ހަސަން): 27
- ހުސައިން ފިރުޝާން: 74
- މުހައްމަދު ފައިސަލް: 26
މިދާއިރާގައި 129 މީހުން ވޯޓް ލާފައިވާއިރު ބާތިލް ދެ ވޯޓުގެ ގޮތުގައި 2 ވޯޓްވަނީ ކަނޑައަޅާފައިއެވެ.
ސައިފް ވާދަކުރެއްވީ ހެންވޭރު ދެކުނު ދާއިރާއަށެވެ. އަހުމަދު އަޝްވަން ނުއުމާނު އާ ވާދަކޮށް ތިން ވޯޓު ތަފާތު ސައިފް ވަނީ ޑިމޮކްރެޓްސްގެ ޓިކެޓު ކަށަވަރުކުރައްވައިފައެވެ. އަހުމަދު އަޝްވަން ނުއުމާނު އަށް 12 ވޯޓު ލިބިފައިވާއިރު ސައިފަށް ލިބިވަޑައިގަތީ 15 ވޯޓެވެ.
މަޖިލިހުގެ އިންތިހާބުގައި 93 ދާއިރާ އަށް ވާދަކުރަން ޑިމޮކްރެޓްސް އިން ނިންމި ނަމަވެސް ކެންޑިޑޭޓުން ކުރިމަތިލީ 41 ދާއިރާއަށެވެ. އޭގެ ތެރެއިން 39 ދާއިރާއަކަށް އެއް ކެންޑިޑޭޓުން ކުރިމަތިލާފައިވާތީ އެ ކެންޑިޑޭޓުންނަށް ޕްރައިމަރީއަކާ ނުލައި ޓިކެޓު ވަނީ ކަށަވަރުވެފައެވެ.
