ޕާކިސްތާންގެ ބަލޯޗިސްތާންގައި 2 ބޮމެއް ގޮއްވާލައި 28 މީހަކު މަރާލައިފިއެވެ.
މި ހަމަލާ ދީފައިވަނީ މާދަމާ އޮންނަ އިންތިހާބާ ދިމާކޮށެވެ. އޮފިޝަލުންނާ ހަވާލާދީ މީޑިއާ ރިޕޯޓުތައް ބުނާގޮތުން މިހާދިސާގައި މަރުވި މީހުންގެ އިތުރުން ގިނަ ބަޔަކު ވަނީ ޒަހަމްވެސް ވެފައެވެ.
ފުރަތަމަ ހަމަލާދީފައިވަނީ ޕިޝިން ޑިސްޓްރިކްޓްގައި އަމިއްލަ ކެންޑިޑޭޓެއްގެ ޕާޓީ އޮފީހަށް އަމާޒުކޮށެވެ. މި ހަމަލާގައި 18 މީހުން މަރުވެފައި ވެއެވެ. ދެވަނަ ހަމަލާ ދީފައިވަނީ ގިއްލާ ސައުފުﷲ ޑިސްޓްރިކްޓް ގައެވެ. މި ހަމަލާގައި 9 މީހުން މަރުވެފައިވެއެވެ.
ފުރަތަމަ ހަމަލާ ދީފައި ވަނީ ސައިކަލެއްގައި ބޮން ހަރުކޮށް ވައިފައި ނިޒާމެއް ބޭނުން ކޮށްގެންނެވެ. މި ހަމަލާ ދީފައިވަނީ އަމިއްލަ ކެންޑިޑޭޓަކު އޭނާގެ އޭޖެންޓާއެކު ބައްދަލުވުމެއް ކުރިއަށް ގެންދަނިކޮށް، އެތަނަށް އަމާޒުކޮށެވެ. ދެވަނަ ހަމަލާ ދީފައިވާ ގޮތް އަދި މުޅިން ސާފެއް ނުވެއެވެ.
މިހަމަލާތަކާ ގުޅިގެން އީރާނާއި އަފްގާނިސްތާނާ ގުޅޭ ޕާކިސްތާންގެ ބޯޑަރު ހުކުރާ ހަމައަށް މިހާރު ވަނީ ބަންދު ކޮށްފައެވެ.
ބަލޮޗިސްތާން ސަރުކާރުން ބުނެފައިވަނީ އިންތިޚާބު ކުރިން ރޭވިފައިވާ ގޮތަށް ކުރިޔަށްދާނެ ކަމަށެވެ.
