ސަރުކާރުގެ މަސް ކުންފުނި، މިފްކޯ އިން މަސް ގަންނަ އަގު ކިލޯއަކަށް 25ރ.ގެ ރޭޓުން 20ރ. އަށް ދަށްކުރަން އިކޮނޮމިކް ކައުންސިލުން ނިންމައިފި އެވެ.
ރާއްޖޭގެ އިގްތިސޯދީ ހާލަތަށް ރިއާޔަތްކޮށް، މަސް ގަންނަ އަގު ދަށްކުރަން އިކޮނޮމިކް ކައުންސިލްގެ އެންމެ ފަހުގެ ބައްދަލުވުމުގައި ވަނީ ނިންމައިފައި ވީ ނަމަވެސް،އެ ނިންމުން އިއުލާނުކޮށްފައެއް ނުވެއެވެ.
އިކޮނޮމިކް ކައުންސިލްގެ ނިންމުންތަކަށް އަމަލުކުރާނީ، ރައީސް އެ ނިންމުމެއް ބަލައިގެންފި ނަމަ އެވެ.
މަސް ގަންނަ އަގު ބޮޑުކުރެއްވީ، މަސްވެރިން ބާނާ މަހަށް ހަމަ އަގު ހޯދައިދޭނެ ކަމަށް ބުނެ ރިޔާސީ އިންތިހާބުގެ ދުވަސްވަރު އެކި ކެންޑިޑޭޓުން އެ ވައުދު ތަކުރާރު ކުރައްވަމުން ދިޔަ ދަނޑިވަޅެއްގަ އެވެ.
ރާއްޖޭގައި ފުޅާ ދާއިރާއެއްގައި މަސްވެރިކަމުގައި ހަރަކާތްތެރިވާ އަމިއްލަ އެއް ކުންފުނި، އެންސިސް ފިޝަރީޒް އިން ވަނީ މަސް ގަތުން ހުއްޓާލާފައި، ދަޅުގައި މަސް ބަންދުކުރާ ފެކްޓަރީ ބަންދުކޮށްފައިއެވެ.
މަސްވެރިންގެ އެންމެ ބޮޑު ކަންބޮޑުވުމަކީ ބާނާ މަސް ވިއްކައިގެން ވަގުތުން ލާރި ނުލިބުމެވެ. މިހާރުވެސް އެތަކެއް މަސްވެރިންނަކަށް ލާރި ނުލިބިފައި އެބަތިއްބެވެ. ސަރުކާރުން ވިދާޅުވެފައިވަނީ މިކަން ހައްލު ކުރުމަށް މަސައްކަތް ކުރަމުންދާ ކަމަށެވެ.
