ފައިލޭރިއާ ބަލިހުރި މިންވަރު ދެނެގަތުމަށް ސްކްރީނިން ޕްރޮގުރާމެއް ހުކުރު ދުވަހު ފަށަން ނިންމާފައިވާކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން މިއަދު ކުރި އިއުލާނެއްގައި ބުނީ، ފައިލޭރިއާއަށް ޓެސްޓުކުރުމުގެ ޕްރޮގްރާމް މުޅި ރާއްޖޭގައި އަންނަ ހުކުރު ދުވަހު ފަށަން ހަމަޖެހިފައިވާ ކަމަށާއި މި ޕްރޮގްރާމް ކުރިއަށް ގެންދިއުމުގައި އެ އެޖެންސީއާ އެކު މޯލްޑިވްސް ރެޑް ކްރެސެންޓް އާއި ހޮސްޕިޓަލްތަކާއި ހެލްތު ސެންޓަރު އަދި ހުރިހާ ކައުންސިލްތަކުން ހަރަކާތްތެރިވާނެ ކަމަށެވެ.
އެޗްޕީއޭ އިން ބުނީ ސްކްރީން ކުރާނީ ގުރުއަތުން ހޮވައިލެވޭ އުމުރުން 18 އަހަރުންމަތީގެ ދިވެހިންނާއި ބިދޭސީން ކަމަށާއި އެ ސްކްރީނިިންގައި ފައިލޭރިއާއަށް ޓެސްޓުކުރާނީ ލޭނަގައިގެން އެންޓިޖަން ޓެސްޓު ކިޓު ބޭނުންކޮށްގެން ކަމަށެވެ. އަދި ޓެސްޓުގެ ނަތީޖާ 10-15 މިނެޓުގެ ތެރޭގައި ލިބޭނެ ކަމަށްވެސް އެޗްޕީއޭ އިން ބުނެއެވެ.
މި ސްކްރީނިންގައި ބައިވެރިވުމަށް ގުރުއަތުން ހޮވޭ ގޭގެއަށް އެ އެޖެންސީގެ ޓީމުތައް މި މަހުގެ 16 ވަނަ ދުވަހުން ފެށިގެން ހަވީރު 4.00 އިން ރޭގަނޑު 9.00 އާ ދެމެދުގެ ވަގުތެއްގައި ޒިޔާރަތް ކުރާނެ ކަމަށް އެޗްޕީއޭއިން ބުނެއެވެ.
މީގެ އިތުރުން ފެބްރުއަރީ 12 ވަނަ ދުވަހު މި ސްކްރީން ޕްރޮގްރާމް ޕްރީ ޓެސްޓު ކުރުމުގެ މަސައްކަތް ހުޅުމާލޭގައި ކުރާނެ ކަމަށާއި ހުޅުމާލެއިން ހޮވާލެވޭ ސަރަހައްދު ތަކެއްގައި ކުރިއަށް ގެނދިއުމަށް ވަނީ ހަމަޖެހިފައެވެ.
ރާއްޖެއިން ކުރިން ނައްތާލާފައިވާ ބައްޔެއް ކަމަށްވާ ފައިލޭރިއާގެ ކޭސްތައް ފުރަތަމަ ފެނުނީ މިދިޔަ މަހުގެ 14ގައި ކުޅުދުއްފުށި ސިޓީންނެވެ. އަދި މިވަގުތު ރާއްޖޭގައި ބަލި ޖެހިފައި ތިބި 32 މީހުންނަކީ ވެސް ފައިލޭރިއާ އާއްމުކޮށް ފެންނަ ‘އެންޑެމިކް’ ގައުމުތަކުގެ މަސައްކަތްތެރިންނެވެ.
