ދައުލަތުން މާލީ ގޮތުން އުފުލަން ޖެހޭ ބުރަ ބޮޑުވުމުގެ ސަބަބުން މަހުގެ އަގު 20ރ. އަށް ކުޑަކޮށްފައިވާ ކަމަށް ފިޝަރީޒް މިނިސްޓަރު އަހުމަދު ޝިޔާމް ރައްޔިތުންގެ މަޖިލިހުގައި މިއަދު ވިދާޅުވެއްޖެ އެވެ.
މިދިޔަ ރިޔާސީ އިންތިހާބުގެ ކެމްޕެއިންގެ ތެރޭގައި ރައީސް އިބްރާހިމް މުހައްމަދު ސޯލިހުގެ ސަރުކާރުން ވަނީ މަހުގެ އަގު 17ރ. އިން 25ރ. އަށް ބޮޑު ކޮށްފަ އެވެ.
އެ ނިންމުން ބަދަލު ކުރުމުގެ ވިސްނުން މި ސަރުކާރުން ގެންގުޅޭތޯ ދާންދޫ ދާއިރާގެ އެމްޑީޕީގެ މެންބަރު ޔައުގޫބް އަބްދުﷲ މަޖިލިހުގެ މިއަދުގެ ޖަލްސާގައި ކުރެއްވި ސުވާލަކަށް ޖަވާބު ދެއްވަމުން މަސްވެރިކަމާ ބެހޭ ވަޒީރު ޝިޔާމް ވިދާޅުވީ، މަސްވެރިންނަށް ދޭން ޖެހޭ ފައިސާ ބަރާބަރަށް ދިނުމަށާއި މިފްކޯ ބަނގުރޫޓު ވިޔަ ނުދިނުމަށް މަހުގެ އަގު ކުޑަކުރަން ނިންމާފައިވާ ކަމަށާއި މިވަގުތު ރާއްޖެ އިން އެކްސްޕޯޓް ކުރާ ބާޒާރުގައި މަސް ކިލޯއަކަށް ލިބެނީ 22.40ރ. އަށް ކަމަށާއި އަދި އެހެން ކަމުން 25ރ. އަށް މަސްވެރިންގެ އަތުން މަސް ގަނެގެން ދެކޮޅެއް ނުޖެހޭނެ ކަމަށެވެ
ކުރީގެ ސަރުކާރުން ބޮޑު ކުރި އަގުގައި މަސް ގަންނަ ނަމަ ދައުލަތުގެ މި އަހަރުގެ ބަޖެޓުން ސަބްސިޑީގެ ގޮތުގައި 1.1 ބިލިއަން ރުފިޔާ ހަރަދު ކުރަން ޖެހޭނެ ކަމަށް ޝިޔާމް ވިދާޅުވި އެވެ.
އެ ސަބްސިޑީގެ ގޮތުގައި މިދިޔަ އަހަރަށް ބަޖެޓު ކޮށްފައި ވަނީ 250 މިލިއަން ރުފިޔާ ކަމަށާއި ނަމަވެސް މަހުގެ އަގު 25ރ. އަށް ބޮޑު ކުރުމުން އެ އަހަރުގެ ފަހު ތިން މަހުގެ ތެރޭގައި 500 މިލިއަން ރުފިޔާ އަށް އެ އަދަދު ބޮޑުވި ކަމަށް ޝިޔާމް ވިދާޅުވި އެވެ.
