ބޭހުގެ ރެގިއުލޭޓްރީ ނިޒާމް ވަރުގަދަކުރުމަށް ދުނިޔޭގެ ސިއްހަތު ޖަމިއްޔާއިން ގަބޫލުކުރާ ގައުމުތަކުން ބޭސް ގެނައުމަށް ފަސޭހަ ގޮތްތަކެއް ކަނޑައެޅުމަށްޓަކައި މެޑިސިން ޕޮލިސީއެއް ލޯންޗުކޮށްފިއެވެ.
ހެލްތު މިނިސްޓްރީގައި ބޭއްވި ރަސްމިއްޔާތުގައި ބުނެފައިވަނީ ތަފާތުކުރުމެއް ނެތި އަދި އެކަށީގެންވާ ވަގުތުގައި ކޮލިޓީ ރަނގަޅު ބޭސް އާންމުންނަށް ލިބޭނެ ގޮތް ހެދުމުގެ މަސައްކަތް ކުރާކަމަށް ބުނެފައެވެ. އަދި މި ޕޮލިސީއަށް އަމަލުކުރަން ފަށާނީ، އެމްއެފްޑީއޭއިން ހަދާ ގައިޑްލައިނަށްފަހުގައި ކަމަށްވެސް ވަނީ ބުނެފައެވެ.
ރާއްޖެއަށް ބޭސް ގެންނަނީ ކެޓަގަރީ ތަކަކަށް ބަހާލައިގެންނެވެ. އެގޮތުން އެއް ވަނައިގައި މިހާތަނަށް 18 ގައުމެއް ހިމެނިފައިވާއިރު އަލަށް ގެންނަ ބަދަލުތަކުގައި ކެޓެގަރީ 1 ގައި ހިމެނޭ ގައުމުތަކުން ބޭސް ގެނައުމަށް ވަރަށް ބޮޑެތި ލުއިތަކެއް ދޭނެ ކަމަށްވެސް ވަނީ ބުނެފައެވެ. ކެޓެގަރީ 1 ގައި ހިމެނޭ ގައުމުތަކަކީ، ޔޫރަޕްގެ ގައުމުތަކާއި އޭޝިއާ އިން މެލޭޝިއާ އަދި ސިންގަޕޫރާ އެކު 45 ގައުމެކެވެ.
ހެލްތު މިނިސްޓްރީން އިތުރަށް ބުނިގޮތުގައި ކޮންމެ ކެޓަގަރީއެއްގައި ހިމެނޭ ގައުމަކަށް ވިޔަސް، ބޭސް އެތެރެކުރުމަށް 45 ޑޮކިއުމަންޓް ހުށަހަޅަންޖެހޭ ކަމަށެވެ. އެ ހުރިހާ އެއްޗެއް ބެލުމަށްފަހު އާ ގަވައިދުގެ ދަށުން ގިނަވެގެން 15 ދުވަހުގެ ތެރޭގައި ބޭސް ރަޖިސްޓްރީކޮށްދޭން ނިންމާފައިވާއިރު، މީގެ ކުރިން ބޭސް ގެނައުމަށް ހުއްދަ ދެވެނީ 90 ދުވަހުގެ ތެރޭގައެވެ.
އެއާ އެކު ގެނެވޭ ބޭހުގެ ކޮލިޓީ ރަނގަޅުވެގެން ދާނޭ ކަމަށާއި އަވަސް މުއްދަތެއްގައި ބޭސް ލިބިގެންދާނެ ކަމަށްވެސް އެ އިދާރާއިން ވަނީ ބުނެފައެވެ.
