މަކަރާއި ހީލަތުން މީހެއްގެ އަތުން އޯޓީޕީ ހޯދައި އޭނާގެ އެކައުންޓުން 500،000ރ ނަގައިފިއެވެ.
އޭނާގެ އަތުން އެ ރުފިޔާ ނަގާފައިވާ ވަނީ ފްލެޓެއް ލިބިފައިވާކަމަށް ބުނެއެވެ. ފުލުހުން ބުނީ އޯޓީޕީ ހޯދައި މީހެއްގެ އެކައުންޓުން ފައިސާ ނެގި މައްސަލަ ހުށަހަޅާފައިވާ ކަމަށެވެ. އެ މައްސަލަ ފުލުހުން އަންނަނީ ތަހުގީގު ކުރަމުންނެވެ.
ފުލެޓް ކަށަވަރު ކުރުމަށް އެއްވެސް އިދާރާއަކުން އޯޓީޕީއެއް ނުފުނުވާނެ ކަމަށާއި އެއީ މަކަރާއި ހީލަތުން ހިންގާ ސްކޭމްތަކެއް ކަމަށް ފުލުހުން ވަނީ ބުނެފައެވެ.
އޮޅުވާލައިގެން ފައިސާ ހޯދުމުގެ މައްސަލަތައް ވަނީ އިތުރުވެފައެވެ. އެގޮތުން އެޗްޑީސީން ފްލެޓެއް ލިބުނު ކަމަށް ބުނެ، އޮޅުވާލައިގެން 2 ލައްކަ ރުފިޔާ ނެގި މައްސަލައެއް މިދިޔަ ބުދަ ދުވަހުވެސް ފުލުހަށް ވަނީ ހުށަހަޅާފައެވެ.
އެ މައްސަލައިގައި މިހާތަނަށް މީހަކު ހައްޔަރުކޮށްފައި ނުވާ ކަމަށާއި އަދި މައްސަލަ އިތުރަށް ތަހުގީގު ކުރަމުންދާ ކަމަށް އޭރު ފުލުހުން ބުނެފައި ވެއެވެ.
މިފަދަ ސްކޭމްތަކާއި ގުޅިގެން ބޭންކުންވެސް ދަނީ އޯޓީޕީ ފަދަ މައުލޫމާތު އެއްވެސް ފަރާތަކާ ހިއްސާ ނުކުރުމަށް އެދެމުންނެވެ. ހޭލުންތެރިކުރުމުގެ ޕްރޮގުރާމުތައް ހިންގަމުން އަންނަ ނަމަވެސް މިފަދަ ސްކޭމްތައް އަދިވެސް ދަނީ ދުވަހެއް ދުވަހަކަށް އިތުރުވަމުންނެވެ.
