ގަލޮޅު ދަނޑުގައި ހިނގި ހަމަނުޖެހުމުގައި 10 މީހަކު ހައްޔަރު ކޮށްފިއެވެ.
ފުލުހުން ބުނި ގޮތުގައި މި މައްސަލަ ދަނީ އަދިވެސް ތަހުގީގު ކުރަމުން ކަމަށާއި މިހާރު10 މީހަކު ހައްޔަރު ކޮށްފައިވާ ކަމަށެވެ.
މިދިޔަ ބުދަ ދުވަހު، ދެ ވަނަ ޑިވިޝަނުގެ ކުއާޓާ ފައިނަލުގައި ކުޑަހެންވޭރު ޔުނައިޓެޑް އާއި ވިކްޓަރީ ސްޕޯޓްސް ކްލަބް ކުޅުނު މެޗުގައި މާރާމާރީ ހިނގާފައިވަނީ ވިކްޓަރީގެ ބިދޭސީ ކުޅުންތެރިޔާ އަނަޓޮލީ ކުރި ފައުލަކާ ރަތްކާޑެއް ދެއްކުމުގެ ބަދަލުގައި ރީނދޫ ކާޑެއް ރެފްރީ ދެއްކުމުންނެވެ.
މި ހަމަނުޖެހުމުގެ ތެރެއިން މީހަކު ވަނީ ވިކްޓަރީގެ ކޯޗު ސޮބާހުގެ މޫނުމަތީ ގޮށްމުށުން ޖަހައި އޭނާގެ އަނގަމަތި ފަޅާލާފައެވެ.
1-3 ގެ ނަތީޖާއަކުން ވިކްޓަރީ މެޗުގެ ލީޑުގައި އޮއްވާ ހިނގި މި ހަމަނުޖެހުމުގެ ސަބަބުން މެޗު ވަނީ އިތުރަށް ކުރިއަށް ނުގެންދެވި ހުއްޓާލަން ޖެހިފައެވެ. އަދި ކުޑަހެންވޭރު ޔުނައިޓެޑުން ބުނީ މެޗުގެ ބާކީ ބައި ކުޅެން ބޭނުން ނުވާތީ ހުއްޓާލިއިރު އޮތް ނަތީޖާއާއެކު ވިކްޓްރީ ސެމީ ފައިނަލަށް ގޮސް މިހާރު އޮތީ މުބާރާތުގެ ފައިނަލުގައެވެ.
