ނިމިދިޔަ ސަރުކާރުގެ ގެދޮރުވެރިޔާ ސްކީމްގެ ދަށުން ހުޅުމާލޭގައި ތަރައްގީކުރަމުން އަންނަ 4،000 ފުލެޓަށް ކުރިމަތިލީ މީހުންގެ ތެރެއިން ޝަރުތުހަމަވީ ކަމަށް ކަނޑައެޅި މީހުންގެ ތެރެއިން ފޯމުތަކުގައި ދޮގު މައުލޫމާތު ދިން މީހުންގެ އެއްބަސްވުން ބާތިލުވާނެ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
މިދިޔަ ސަރުކާރުން އާންމުކުރި ފުލެޓު ލިސްޓާ ގުޅިގެން ކަންބޮޑުވުން ބޮޑުވެފައި އޮއްވައި އޭސީސީން ވަނީ އެ ލިސްޓުގައި ނަން އޮތް 60 އިންސައްތައެއްހާ މީހުންގެ ޝަރުތު ފުރިހަމަނުވާ ކަމަށް ބުނެފައެވެ.
ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައާ ބެހޭ ކޮމިޓީއަށް މިއަދު މިނިސްޓަރު ހައިދަރު ހާޒިރުކޮށްފައިވާއިރު، ކޮމިޓީގައި ވާހަކަދައްކަވަމުން މިނިސްޓަރު ވިދާޅުވީ، ޝަރުތު ހަމަވިކަމަށް އޭސީސީން އެންގި މީހުންނަށް ފުލެޓު ދިނުމުގެ މަސައްކަތް އަންނަ ހަފުތާގައި ފަށާނެ ކަމަށާއި ޝަރުތުހަމަނުވާ ކަމަށް އޭސީސީން ކަނޑައެޅި 60 އިންސައްތަ މީހުންގެ ފޯމުތަކުގެ ސައްހަކަން ކަށަވަރުކުރާނެ ކަމަށެވެ.
މިނިސްޓަރު ހައިދަރު ވިދާޅުވީ ފުލެޓަށް ކުރިމަތިލާއިރު ދެވޭ މައުލޫމާތަކީ ސައްހަ ނޫން މައުލޫމާތެއް ނަމަ، އެ އެއްބަސްވުން ބާތިލުކުރެވޭނެ ކަމަށް ޕޯޓަލްއަށް މައުލޫމާތު ހުށަހަޅާއިރު ވެސް ފެންނަން އޮންނާނެ ކަމަށެވެ.
އެހެންކަމުން، ފުލެޓަށް ޝަރުތު ހަމަވި މީހުންގެ ތެރެއިން ދޮގު މައުލޫމާތު ދިން މީހުންނާއި އޮޅުވައިލި މީހުންގެ އެއްބަސްވުންތައް ބާތިލުވާނެ ކަމަށް މިނިސްޓަރު ވިދާޅުވިއެވެ.
އޭސީސީގެ ލަފަޔާ އެއްގޮތަށް އެ މީހުންގެ ޝަރުތު ހަމަވޭތޯއާއި އޭސީސީގެ ލަފާ ރަނގަޅުތޯ މިނިސްޓްރީން ކަށަވަރުކުރާނެކަމުގެ ޔަގީންކަން މިނިސްޓަރު ވަނީ އަރުވައިފައެވެ.
ފުލެޓަށް ކުރިމަތިލާއިރު ޕޯޓަލްއަށް ދޭ މައުލޫމާތަކީ ސައްހަ ނޫން މައުލޫމާތެއް ނަމަ، އެއްބަސްވުން ބާތިލުވާނެ ކަމަށް ބަޔާންކޮށްފައިވާކަން ފާހަގަކޮށް މިނިސްޓަރު ވިދާޅުވީ، އެހެންވެ ޝަރުތުހަމަނުވާ މީހުންނަށް ފުލެޓު ދޫނުކުރާނެ ކަމަށެވެ.
