އެމްޑީޕީން މިހާރު ވަނީ ޕާޓީގެ ރައީސްގެ އިންތިހާބު ތާވަލުކޮށް އެ މަގާމަށް ޝައުގުވެރިވާ މެންބަރުންނަށް ފުރުސަތު ހުޅުވާލާފައެވެ. އިންތިހާބު އޮތީ އ މާރޗް މަހުގެ ދެވަނަ ދުވަހު އެވެ. އަންނަ އަންގާރަ ދުވަހުގެ ނިޔަލަށް ކުރިމަތި ލެއްވުމުގެ ފުރުސަތު އޮންނާނެ އެވެ.
އެމްޑީޕީގެ ރައީސްގެ މަގާމަށް ހުޅުވާލުމުގެ ކުރީން ވެސް ކުރީގެ ފޮރިން މިނިސްޓަރު އަބްދުﷲ ޝާހިދު ވަނީ އެ މަގާމަށް ޝައުގުވެރިކަން ފާޅު ކުރައްވާފަ އެވެ.
އެމްޑީޕީގެ ރައީސް ކަމަށް ކުރިމަތިލައްވާނެ ކަމަށް ޝާހިދު އަދި ރަސްމީކޮށް އިއުލާނެއް ނުކުރެއްވި ނަމަވެސް އެމްޑީޕީގެ އިސް ބޭފުޅުންގެ އަރިހުގައި ޝާހިދު ވަނީ އެކަން ރަސްމީކޮށް ހާމަ ކުރައްވާފަ އެވެ. ފޯމް ލައްވާނެ ކަމަށް ބެލެވެނީ އެންމެ ފަހު ދުވަހުއެވެ.
މިހާރު ބެލެވިފައި އޮތީ އެމްޑީޕީގެ ރައީސް ކަމަށް ވާދަ ކުރައްވާނީ ހަމައެކަނި ޝާހިދު ކަމަށެވެ.
އެމްޑީޕީގެ ރައީސްގެ މަގާމަށް ވަޑައިގަތުމުގެ ދަތުރު ޝާހިދު ފެއްޓެވީ ކުރީގެ ރައީސް / އެމްޑީޕީގެ މިހާރުގެ ވަގުތީ ރައީސް، ރައީސް އިބޫއާ މަޝްވަރާ ކުރައްވާފައެވެ. މައުލޫމާތު ލިބިފައިވާ ގޮތުގައި ޝާހިދު ހުންނެވީ ރައީސް އިބޫ، އެ މަގާމަށް ވާދަ ކުރައްވާނަމަ ފަހަތަށް ޖެހިވަޑައިގަތުމަށް ތައްޔާރަށެވެ.
