އިންޑިއާއިން ފިޔާ ގެންނަނީ ދެ ސަރުކާރުގެ ދެމެދުގައި ވެފައި އޮތް ހާއްސަ އެއްބަސްވުމަކުން، އެކަން ކުރިއަށް ދާނެކަމަށް ރާއްޖޭގައި ހުންނަ އިންޑިއާގެ ހައި ކޮމިޝަނުން މިއަދު ބުނެފިއެވެ.
ހައި ކޮމިޝަނުން މިފަދައިން ބުނެފައިމިވަނީ އިންޑިއާއިން ފިޔާ އެކްސްޕޯޓް ކުރަން ހުއްދަ ދިން ގައުމުތަކުގެ ލިސްޓުގައި ރާއްޖޭގެ ނަން ނެތް ކަމަށް އެ ގައުމުގެ މީޑިއާތަކުން ރިޕޯޓްކުރަމުންދާ ދަނޑިވަޅެއްގައެވެ. އެގޮތުން ރާއްޖެ އާއި އިންޑިއާއާ ދެމެދު ހަދާފައިވާ ވިޔަފާރީގެ އެއްބަސްވުމުގެ ދަށުން، ރާއްޖެ އަށް ބޭނުންވާ ޒަރޫރީ ނުވަ ބާވަތެއް ފަސޭހަ ކަމާ އެކު، އެތެރެ ކުރުމަށް ތިން އަހަރުގެ އެއްބަސްވުމެއް އެބައޮތް ކަމަށް ހައި ކޮމިޝަނުން ވަނީ ބުނެފައެވެ.
އިންޑިއާއިން ތިން އަހަރު ދުވަހުގެ މުއްދަތަކަށް އެންމެ ފަހުން މި އެއްބަސްވުން ހަދާފައިވަނީ ޖުލައި 2021 ގައެވެ. މި އެއްބަސްވުން މި އަހަރުގެ މާޗުގެ ނިޔަލަށް ހަމަވާނެއެވެ.
ހައި ކޮމިޝަނުން ބުނި ގޮތުގައި މި އެއްބަސް ވުމުގެ މުއްދަތު ހަމަވުމުން އެއްބަސްވުން އާކުރެވޭނެއެވެ. މީގެއިތުރުން އެސްޓީއޯއިން ވަނީ އިންޑިއާއިން ފިޔާ ލިބުމުގައި އެއްވެސް ދަތިކަމެއް ނެތް ކަމަށާއި، ކުރިއެކޭވެސް އެއްފަދައިން އެސްޓީއޯއިން ސްޓޭބަލް ސަޕްލައިއެއްގައި ފިޔާ ފޯރުކޮށްދެމުންދާނެ ކަމަށެވެ. އަދި ފާއިތުވި ދެ މަހުގެ މާކެޓް ޓްރެންޑަށް ބަލާކަމުގައިވާނަމަ ރާއްޖޭގެ މާކެޓްގައި ފިޔާގެ އަގު އަންނަނީ ތިރިވަމުން ކަމަށްވެސް ވަނީ ބުނެފައެވެ.
