މަޖިލީހުން މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އަށް އައިމިނަތު ނުޒުހާ އައްޔަންކުރަން ފާސްކޮށްފިއެވެ.
ބްރޯޑްކޮމް އިން ހުސްވެފައިވާ މަގާމަށް އައްޔަނު ކުރި ނުޒުހާ އަކީ ރާއްޖެ ޓީވީގެ ކުރީގެ ޕްރެޒެންޓަރެވެ. މި މަގާމަށް މީހަކު އައްޔަނުކުރަން ސަރުކާރުން ނިންމީ މިދިޔަ އަހަރު ޖެނުއަރީ މަހު 8 ގައި އެ ކޮމިޝަންގެ މެންބަރު އަހުމަދު ގައިސް އިސްތިއުފާ ދެއްވުމުންނެވެ.
ގައިސް އިސްތިއުފާ ދެއްވީ ރައީސް އިބްރާހިމް މުހައްމަދު ސޯލިހުގެ ރިޔާސީ ޕްރައިމަރީގެ ކެމްޕެއިނަށް ވަގުތު ހުސް ކުރެއްވުމަށެވެ.
މި މަގާމަށް އައްޔަނުކުރުމަށް ކޮމިޓީން މަޖިލީހަށް ފޮނުވީ:
- އައިމިނަތު ނުޒުހާ، ރިވޯޑް، ހއ. ހޯރަފުށި
- ހުސެއިން އަމްރު، ވ. ރޯޝަން
- މަރިޔަމް ނަރީމާން ޝަރީފް، މުޝްތަރީގެ، ގދ. ތިނަދޫ
34 މެންބަރުންގެ އިއްތިފާގުން ނުޒުހާ ހޮވުނުއިރު، އޭނާއަށް ވޯޓު ދިނީ އިދިކޮޅު އެމްޑީޕީ އާއި ޑިމޮކްރެޓްސް ޕާޓީގެ މެމްބަރުން އެކަންޏެވެ. ސަރުކާރު ނުވަތަ ޕީޕީއެމް/ޕީއެންސީގެ މެމްބަރުން އެ ވޯޓުގައި ބައިވެރިވެވަޑައެއް ނުގަންނަވައެވެ.
ބްރޯޑްކޮމްގެ މިހާރުގެ ރައީސަކީ މަރިޔަމް ވަހީދާ އަދި ނައިބު ރައީސަކީ މުހައްމަދު ފަޒީންއެވެ.
