ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގދ. ގައްދޫއަށް ވަޑައިގެން އެ ރަށުގައި އިއްޔެ ބޭއްވެވި ޖަލްސާގައި ރަށު ކައުންސިލުގެ މެމްބަރުން ބައިވެރިނުުުވުމުން އެކަމާ ފާޑުކިޔުން އަމާޒުވެފައި ވަނިކޮށް ގައްދޫ ކައުންސިލުން އެއަށް ރައްދުދީ ބުނީ ރައީސް އޮފީހުންނާއި ސަރުކާރުގެ ބައެއް އިދާރާތަކުން އެކަށީގެންވާ ވަރަށް އެއްބާރުލުން ނުދިން ކަމަށެވެ.
ރައީސް ވަޑައިގަތުމުގެ ފަސް ދުވަސް ކުރިން ރައީސް އޮފީހުން ކައުންސިލަށް އެކަން އަންގާފައިވާ ކަމަށާއި، އެހެންވެ ކައުންސިލާއި އެ ރަށުގައި ހިންގާ ސަރުކާރުގެ އިދާރާތަކުން އެ ދަތުރުފުޅުގެ އިންތިޒާމުތައް ހަމަޖެއްސުމުގެ މަސައްކަތް ފުރިހަމަކަމާއެކު ކޮށްފައިވާނެކަމަށްވެސް ގައްދޫ ކައުންސިލުން ވަނީ ބުނެފައެވެ.
މީގެއިތުރުން ގައްދޫ ކައުންސިލުގެ އިދާރާގައި އެ ކައުންސިލްގެ މެމްބަރުންނާ އެކު ބާއްވަން ނިންމެވި ބައްދަލުވުން އެހެން ތަނަކަށް ބަދަލުކުރި ކަމަށާއި އެގޮތަށް ބަދަލުކުރީ ކައުންސިލުގެ އިދާރާ އަކީ ރައްކާތެރި ތަނެއް ނޫން ކަމަށް ރައީސް ވިދާޅުވެފައި ކަމަށް މައުލޫމާތު ލިބިފައިވާ ކަމަށް ރައީސާއި ނައިބު ރައީސްގެ އެއްބާރުލުން ލިބިވަޑައިނުގަންނަވާ ކަމަށް ވިދާޅުވެ ރައީސް ދެއްކެވި ވާހަކަފުޅު ކުށްވެރިކޮށް ނެރުނު ބަޔާނުގައި ގައްދޫ ކައުންސިލް އިދާރާ އިން ވަނީ ބުނެފައެވެ.
ހަމަ އެހެންމެ، ދައުލަތުގެ މުދަލާއި ފައިސާ ބޭނުންކޮށްގެން ވަކި ސިޔާސީ މަގްސަދެއް ކުރިއަރުވަން ބޭނުންފުޅުވި ދަތުރަކަށް ރައީސްގެ ދަތުރުފުޅު ބަދަލުކޮށްލާފައިވާ ކަމަށް ވެސް ބަޔާނުގައިވެއެވެ.
ގައްދޫގައި އިއްޔެ ބޭއްވި ޖަލްސާގައި ވާހަކަ ދައްކަވަމުން ރައީސް ވިދާޅުވީ، އެމަނިކުފާނު ކުރައްވަމުން ގެންދަވާ ދަތުރުފުޅުގައި ވަރަށް ގިނަ ކައުންސިލުތަކަކާއި ބައްދަލުކުރެއްވި ކަމަށެވެ. ނަމަވެސް، ގައްދޫ ކައުންސިލުން ލިބުނު އެއްބާރުލުން ކުޑަ ކަމަށް ރައީސް ވަނީ ވިދާޅުވެފައެވެ.
މި މޭރުމުން ވާހަކަފުޅު ދައްކަވަމުން ރަައީސް ވިދާޅުވީ، އެމްޑީޕީ އަކީ މިއަދާ ހަމައަށް އައިއިރުގައި ސިޔާސީގޮތުން ހިޔާލު ތަފާތު ޕާޓީއެއް ކަމަށާއި، ނަމަވެސް ކައުންސިލުތަކުގެ ރައީސުންނާއި ސިޓީތަކުގެ މޭޔަރުން ވެސް ފުރިހަމަ އަށް ބައިވެރިވެވަޑައިގަންނަވާ ކަމަށެވެ.
