މިދިޔަ އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންނާ އަޅައިބަލާއިރު އިއްޔެގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 16 އިންސައްތަ އިތުރުވެފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީއިން މިއަދު އާންމުކުރި ތަފާސްހިސާބުތައް ދައްކާގޮތުން އިއްޔެގެ ނިޔަލަށް ޖުމްލަ 378,245 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.
ދުވާލެއްގެ މައްޗަށް އެވަރެޖްކޮށް ރާއްޖެއަށް 6,877 ފަތުރުވެރިން ޒިޔާރަތްކުރާ ކަމަށް ތަފާސްހިސާބުތަކުން ދައްކާއިރު، އެ ތަފާސްހިސާބުތައް ދައްކާގޮތުން ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވަނީ ޗައިނާއިންނެވެ. އެގޮތުން އެގައުމުން 51،984 ފަތުރުވެރިން ޒިޔާރަތްކޮށްފައިވެއެވެ.
މީގެއިތުރުން، މި މަހު އެންމެ ގިނަ ފަތުރުވެރިން މިހާތަނަށް އައިސްފައިވަނީ މިމަހުގެ 10 ވަނަ ދުވަހުއެވެ. އެދުވަހު އެކަނިވެސް ރާއްޖެއަށް 10،231 ފަތުރުވެރިން އައިސްފައިވާއިރު ފެބްރުއަރީ 11 ގައި ވަނީ 9،646 ފަތުރުވެރިން އައިސްފައެވެ.
ރާއްޖޭގައި 180 ރިޒޯޓެއް ހުރި އިރު، އެ ރިޒޯޓުތަކުގައި 44،180 ޓޫރިސްޓް ބެޑް ހުރެއެވެ. އެ ރިޒޯޓްތަކުގެ ތެރެއިން 175 ރިޒޯޓެއްގައި ޚިދުމަތް ދެމުން އަންނަ އިރު، އެ ރިޒޯޓްތަކުން ހިއްސާ ކުރަނީ 43،178 ޓޫރިސްޓް ބެޑެވެ.
