ކުރިއަށް އޮތް ރައްޔިތުންގެ މަޖިލިސް އިންތިހާބުގައި މި ސަރުކާރުން ދަނީ އެކި ގޮތްގޮތުން ތުހުމަތު ފޯރުވަމުން ކަމަށް ބުނެ އެމްޑީޕީ އިން ތުހުމަތުކޮށްފިއެވެ.
“މިސްރާބު ހަމަ މަގަށް” ގެ ނަމުގައި އެމްޑީޕީން މަޖިލިސް އިންތިހާބަށް ފަށާފައިވާ ކެމްޕޭންގެ މައުލޫމާތު ހާމަކުރަން އެ ޕާޓީން މިއަދު ބޭއްވި ނޫސްވެރިންގެ ބައްދަލުވުމުގައި ކެމްޕޭންގެ ތަރުޖަމާނު އަހުމަދު އީސާ ވިދާޅުވީ އިންތިހާބަށް ސަރުކާރުގެ ނުފޫޒު ފޯރުވުން ހައްދުފަހަނަ އަޅައި ގޮސްފައިވާ ކަމަށް ވިދާޅުވެފައެވެ.
މީގެ އިތުރުން މަޖިލިސް އިންތިހާބަށް އެސްއެމްއީ ލޯނު ބަހަމުން ގެންދާ ކަމަށާއި ވަޒީފާތައްވެސް ދެމުންގެންދާ ކަމަށްވެސް އޭނާ ވަނީ ވިދާޅުވެފައެވެ.
އެމްޑީޕީ އިން މިފަދަ ތުހުމަތެއް ކޮށްފައި މިވަނީ އިންތިހާބު ފަސްކުރަން ރައްޔިތުންގެ މަޖިލީހުން ފޮނުވި ބިލް ތަސްދީގު ނުކުރައްވާ، ރައީސް އެ ބިލް އަނބުރާ މަޖިލީހަށް ފޮނުވާފައި ވަނިކޮށެވެ.
މިކަމާ ގުޅިގެން މަޖިލީހުގެ އިދިކޮޅު ފަރާތްތަކުންވެސް ބުނެފައިވަނީ އެ ބިލް ރައީސް ތަސްދީގު ކުރަން ރައީސް ބޭނުންނުވަނީ އިންތިހާބު ފަސްކުރުމަކީ ސަރުކާރު ހިންގާ ޕީޕީއެމް-ޕީއެންސީ ކޯލިޝަނަށް ސިޔާސީ ގޮތުން ގެއްލުމަކަށް ވާނެތީ ކަމަށެވެ.
