ރައްޔިތުންގެ މަޖިލީހަށް އިންތިހާބު ވެއްޖެ ނަމަ ޕާޓީ ބަދަލު ނުކުރާނެ ކަމަށް އެމްޑީޕީގެ ޓިކެޓުގައި މަޖިލީހަށް ވާދަކުރާ ކެންޑިޑޭޓުން، މާތްﷲ ގަންދީ ރޭ ހުވާކޮށްފި އެވެ.
މަޖިލިސް އިންތިހާބުގެ އެމްޑީޕީގެ ކެމްޕެއިން ފެށުމަށް ރޭ ބޭއްވި “މިސްރާބު ހަމަމަގަށް” ޖަލްސާގައި ކެންޑިޑޭޓުންނަށް މި ހުވާލައިދެއްވީ އެ ޕާޓީގެ ޗެއާޕާސަން ފައްޔާޒު އިސްމާއިލެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލީހަށް އެމްޑީޕީގެ 65 މެންބަރުން އިންތިހާބުވި ނަމަވެސް، މިހާރު އެ ޕާޓީގެ ތިބީ 43 މެންބަރުންނެވެ. މިމައްސަލަ ބޮޑުވެ މިކަން ހުއްޓުވުމަށް އެމްޑީޕީން ވަނީ އިންތިހާބުވާ ޕާޓީ ބަދަލު ކޮށްފި ނަމަ ގޮނޑި ގެއްލޭ ގޮތަށް އެންޓި ޑިފެކްޝަން ގާނޫނެއް ހެދުމަށް މަޖިލީހަށް ބިލް ހުށަހަޅައިފަ އެވެ.
ސިޔާސީ ޕާޓިއަކުން ވަކި ކޮށްފި ނަމަ އެ ދާއިރާގެ ރިކޯލް ވޯޓަކަށް އިލެކްޝަންސް ކޮމިޝަން އިން ދާން ޖެހޭނެ ކަމަށާއި އެ މެމްބަރެއްގެ ގޮނޑި ގެއްލޭނީ ދާއިރާގެ ރައްޔިތުން އޭނާ އަށް ނޫނެކޭ ބުނެފި ނަމަ އެވެ.
އަދި އެ މެންބަރު އަމިއްލަ އަށް ޕާޓީން ވަކިވެއްޖެ ނަމަ އޭނާ ގޮނޑިން އިސްތިއުފާ ދެއްވަން ޖެހޭނެ ކަމަށް ބިލްގައިވެ އެވެ.
