ރައްޔިތުންގެ މަޖިލިސް އިންތިހާބާ ގުޅޭ ގޮތުން މަޝްވަރާކުރުމަށް އީސީގެ މެމްބަރުން މަޖިލީހަށް ހާޒިރުކުރަން ނިންމައިފިއެވެ.
މިކަން އިއުލާނުކޮށްފައިވަނީ އީސީގެ މެމްބަރުން މާޗު 4 ވަނަ ދުވަހު 11 ޖަހާއިރު ކޮމިޓީ އަށް ހާޒިރު ވުމަށް އެދި މިއަދު ފޮނުވި ސިޓީ އެއްގައެވެ. ރައީސް ޑރ. މުހައްމަދު މުއިއްޒު އަދިވެސް އެ ބިލު ތަސްދީގުކުރައްވާފައެއް ނުވެއެވެ.
20 ވަނަ ރައްޔިތުންގެ މަޖިލީހުގެ އިންތިހާބު ރަމަޟާން މަހާ ދިމާވާތީ ރަމަޟާން މަސް ނިމޭތާ 10 ދުވަސް ފަހުން އިންތިހާބު ބާއްވަން ޖެހޭ ގޮތަށް އިންތިހާބުތަކާ ބެހޭ ގާނޫނަށް އިހަވަންދޫ ދާއިރާގެ މެންބަރު މުހައްމަދު ޝިފާއު ހުށަހެޅުއްވި އިސްލާހު ރައްޔިތުންގެ މަޖިލީހުން މި މަހުގެ 11 ވަނަ ދުވަހު ފާސްކޮށް، 12 ވަނަ ދުވަހު އެ ބިލު ތަސްދީގުކުރުމަށް ވަނީ ފޮނުވައިފައެވެ.
ނަމަވެސް އެ ބިލް ރައީސް ތަސްދީގު ނުކުރައްވާ އަލުން ވަނީ މަޖިލީހަށް ފޮނުއްވާފައެވެ. މަޖިލީހުން ވަނީ މެޖޯރިޓީއާއެކު ދެވަނަ ފަހަރަށް ބިލް ފާސްކޮށްފައެވެ. ގާނޫނުގައި ވާގޮތުން މިހާ ހިސާބުން ބިލް ތަސްދީގުކޮށް ގެޒެޓުގައި ޝާއިއުކުރަން ޖެހޭނެއެވެ.
ރައްޔިތުންގެ މަޖިލިސް އިންތިހާބު ބޭއްވުމަށް ކަނޑައަޅާފައިވަނީ އަންނަ މަހުގެ 17 ވަނަ ދުވަހުއެވެ. އެއީ ރޯދަ މަހުގެ 6 ވަނަ ދުވަހެވެ. މަޖިލީހުން ފާސް ކުރި ގާނޫނުގައި ބުނެފައިވަނީ ރޯދަ މަހުގެ ދުވަހެއްގައި އިންތިހާބެއް ބާއްވާއިގެން ނުވާނެ ކަމަށާއި އިންތިހާބު ބާއްވަންޖެހޭ ތާރީހު ރޯދަ މަހުގެ ދުވަހަކާ ދިމާވާނަމަ، އެ އިންތިހާބެއް ބާއްވަން ވާނީ ރޯދަ މަސް ނިމުމުގެ 10 ދުވަސް ފަހުން ކަމަށެވެ.
