މާބޮޑު ޕްލޭނެއް ނެތި ފެށުމުން ރަސްމާލެ މަޝްރޫ ހުއްޓިފައިވާކަމަށާއި ނަމަވެސް ވީހާވެސް އަވަހަކަށް މި މަޝްރޫގެ މަސައްކަތް އަލުން ފަށާނެ ކަމުގައި މިނިސްޓާ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ ޑރ. އިބްރާހީމް މުއްތަލިބް ވިދާޅުވެއްޖެއެވެ.
މުއްތަލިބު މިފަދައިން ވިދާޅުވީ ކޮންސްޓްރަކްޝަން މިނިސްޓްރީގެ ބެލުމުގެ ދަށުން ކުރިއަށް ގެންދާ މަޝްރޫތަކުގެ ތަފުސީލުތައް ހިއްސާކުރަން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުންނެވެ. އެ ބައްދަލުވުމުގައި މިނިސްޓަރު ވިދާޅުވީ، ރަސްމާލެ ހިއްކުމުގެ މަސައްކަތް ކުރާ ނެދަލެންޑްސްގެ ބޮސްކާލިސްއާ ގުޅިފައިވާ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އިން މަސައްކަތް ފެށީ ވެލި ހޯދުމަށް މާބޮޑު ދިރާސާއެއް ނުކޮށް، މަސައްކަތް ފެށުމަށްފަހު ވެލި ހޯދާ ގޮތަށް ކަމަށެވެ.
މިނިސްޓަރު ވިދާޅުވީ ރަސްމާލެ މަޝްރޫއަކީ ދައުލަތުން އެއްވެސް ފައިސާ ހަރަދު ނުކުރާ މަޝްރޫއަކަށް ވާތީ މަޝްރޫއުގެ ކޮންޓްރެކްޓަރަށްވެސް އެންމެ ހަރަދު ކުޑަކޮށް އެކަން ކުރެވޭނެ ގޮތެއް އެ ފަރާތުން ބަލާނެ ކަމަށެވެ. އެކަމަކު ވީހާވެސް އަވަހަށް ރަސްމާލެ ހިއްކުމުގެ މަސައްކަތް ފެށުމަށް ސަރުކާރުން ބާރުއަޅާނެ ކަމުގައި ވިދާޅުވިއެވެ.
މި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހިންގާ އެންމެ ބޮޑު މަޝްރޫއުކަމަށްވާ ފުށިދިއްގަރުފަޅު ހިއްކުމުގެ މަޝްރޫއުގެ މަސައްކަތްތައް ފެށީ ޑިސެމްބަރު މަހުގެ 18 ވަނަ ދުވަހުއެވެ. ސީއެމްސީސީ އާ އަށް މަސް ދުވަހަށް ހަވާލުކޮށްގެން ކުރިއަށް ގެންދާ މި މަޝްރޫއުގެ ދަށުން ފުށިދިއްގަރުފަޅުން 1،153 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ.
ފުށިދިއްގަރު ފަޅަކީ ގާތްގަނޑަކަށް 1،280 ހެކްޓަރުގެ ބޮޑު ސަރަހައްދެކެވެ. އެ ފަޅުން 1153 ހެކްޓަރު ހިއްކަން ނިންމާފައިވާއިރު މި މަޝްރޫއުގެ ފުރަތަމަ ހިއްކާ 29 ހެކްޓަރު ބޭނުންކުރާނީ މަޝްރޫއުގެ ބޮޑެތި ފިޔަވަހިތައް ނިންމުމަށް ބޭސްއެއްގެ ގޮތުގައެވެ. ފުށިދިއްގަރު ފަޅުގައި ތަރައްގީކުރާ ރަސްމާލެ ތަރައްގީ ކުރާނީ ޒީރޯ ކާބަން، ސޭފް އައިލެންޑް ކޮންސެޕްޓަށެވެ.
