މުސާރައަށް ކުރާ ހަރަދު އިތުރުވާތީ ކުރީގެ ރައީސް އިބްރަހީމް މުހައްމަދު ސޯލިހު ކަންބޮޑުވުން ފާޅުކުރައްވައިފިއެވެ.
ރައީސް ސޯލިހު މިފަދައިން ވިދާޅުވެފައިވަނީ އަންނަ މަހު ބާއްވާ ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓުގައި މާފަންނު އުތުރަށް ވާދަކުރައްވާ އިފްހާމް ހުސެއިންގެ ކެމްޕެއިން ޖަގަހަ ހުޅުވުމަށް ރޭ ބޭއްވި ހަފުލާގައި ވާހަކަފުޅު ދައްކަވަމުންނެވެ.
އެގޮތުން ސޯލިހު ވިދާޅުވީ ރާއްޖޭގެ އިގުތިސޯދީ ހާލަތު އޮތް ގޮތާ ގުޅޭ ގޮތުން މި ސަރުކާރުން ދައްކާ ވާހަކަ އާއި އަމަލާ ދިމާނުވާ ކަމަށާއި، 2023 ވަނަ އަހަރުގެ ފުރަތަމަ ތިން މަހާއި މި އަހަރުގެ ފުރަތަމަ ތިން މަހާ އަޅައި ބަލާއިރު ގާތްގަނޑަކަށް 300 މިލިއަން ރުފިޔާ އިތުރަށް ހަރަދުކޮށްފައިވާކަން ފެންނަން އެބަ އޮތް ކަމަށް ވިދާޅުވިއެވެ.
އެނގޭ ކަމަކީ ސިޔާސީ މަގާމުތަކަށް މީހުން ލާކަން. ފުނިފުންޏަށް، ބައެއް މިނިސްޓްރީތަކުގައި އިށީންނާނެ ތަނެއް ނެތް. ކޮރިޑޯތަކުގައި ކިޔު ޖެހިފައި ތިބޭ ކަމަށް އެބަވޭ. ޑިއުޓީ ބަހައިގެން ގޮނޑި މޭޒު ހަވާލު ކުރަމުން އަބަދޭ. އަންދާޒާ މިހާރު ކުރެވޭ ގޮތުގައި، އެބޭފުޅުން މައުލޫމާތު ދެއްވީމަ އެނގޭނީ، 1500 އަށްވުރެ ގިނަ ސިޔާސީ މަގާމު މިހާރު ވާނީ އުފައްދާފައި. އެހެން ނޫންނަމަ މަހެއްގެ މައްޗަކަށް 100، 150 މިލިއަން ރުފިޔާ ބަޖެޓަކުން ރިކަރަންޓް ހަރަދަކަށް، މުސާރައަކަށް ހަރަދުކުރާކަށް ނުޖެހޭނެ — ސޯލިހު
ސޯލިހު އިތުރަށް ވިދާޅުވީ މި ސަރުކާރުން އިސްރާފު ކުރަމުންދާ ކަމަށާއި އެ ސަބަބުތަކަށްޓަކައި ރައްޔިތުންގެ މަޖިލީހުގެ މެޖޯރިޓީ އިދިކޮޅުން ނަގައި، ހަމަމަގަށް އަޅުވަންޖެހޭ ކަމަށެވެ.
