ރާއްޖެއަށް މެލޭޝިއާ އެއާލައިންސް އިން ދަތުރުތައް ފަށަން ނިންމައިފިއެވެ.
އެގޮތުން އެ ގައުމުގެ ވެރިރަށް ކުއަލަލަމްޕޫރުން ވެލާނާ އިންޓަނޭޝަނަލް އެއާޕޯޓަށް ކުރާ ދަތުރުތައް ފަށާނީ އަންނަ އޮގަސްޓުގެ ފުރަތަމަ ދުވަހުއެވެ. އެ އެއާލައިން އިން ބުނިގޮތުގައި އެއްކޮޅު ޓިކެޓުގެ އަގު 1,276ރ. ގައި އުޅޭއިރު ދެކޮޅު ޓިކެޓުގެ އަގު އުޅެނީ 2,820ރ. އެވެ.
އާ މާކެޓުތަކަށް ވިޔަފާރި ފުޅާކޮށް ކަސްޓަމަރުން އިތުރުކުރުމުގެ އަމާޒުގައި މެލޭޝިއާ އެއާލައިންސުން އަންނައިރު ރާއްޖެ ވެގެންދާނީ ދެކުނު އޭޝިއާގައި އެ އެއާލައިން ދަތުރުކުރާނެ 13 ވަނަ މަންޒިލަށެވެ.
ކޮންމެ ދުވަހަކު އެ އެއާލައިނުން ރާއްޖެއަށް ދަތުރުތައް ބާއްވާނެއެވެ. އަދި ރާއްޖެއަށް މިވަގުތު 39 އެއާލައިނަކުން ދަނީ ފްލައިޓުތައް އޮޕަރޭޓު ކުރަމުންނެވެ.
