ފަލަސްތީނުގެ ޣައްޒާގައި ދެމުން ގެންދާ ހަމަލާތައް ވަގުތުން ހުއްޓާލަން ގޮވާލައި އދ. ގެ ސަލާމަތީ މަޖިލީހުން ރޭ ފާސްކުރި ގަރާރު ފުރިހަމަ އަށް ތަންފީޒުކޮށް، ޣައްޒާގެ ރައްޔިތުން ކޮންމެހެން ބޭނުންޖެހިފައިވާ އެހީތެރިކަން މިހާރުން މިހާރަށް ފޯރުކޮށްދޭން ފޮރިން މިނިސްޓަރު މޫސާ ޒަމީރު ގޮވާލައްވައިފި އެވެ.
އިޒްރޭލުން އަދިވެސް ހުއްޓާނުމެއްނެތި ހަމަލާ ދެމުން ދާއިރު، ޣައްޒާގައި އާންމުން ބަނޑަށް ޖެހޭ ހާލަތަށް ވަނީ ގޮސްފަ އެވެ. ނަމަވެސް އެހީގެ ސާމާނު ޣައްޒާ އަށް ވަންދަން އިޒްރޭލުން ގަސްދުގައި ހުރަސްއަޅަމުން ގެންދާ ކަމަށް އދ. އިން އެތައް ފަހަރަކު ވަނީ ބުނެފަ އެވެ.
އދ.ގެ ސަލާމަތީ މަޖިލީހުން ރޭ ފާސްކުރި ގަރާރަށް މަރުހަބާ ވިދާޅުވެ ޒަމީރު އެކްސްގައި ވިދާޅުވީ، މި ގަރާރަކީ ދެމެހެއްޓެނެވި ގޮތެއްގައި ޣައްޒާގައި ހަމަލާތައް ހުއްޓައިލުމުގެ އިތުރުން ސަރަހައްދުގައި ސުލްހަ ގާއިމުކުރަން އެޅުނު މުހިންމު ފިވަޔަޅެއް ކަމަށެވެ.
މި ގަރާރު ފާސްކުރުމުގެ ކުރިން އެކި ފަހަރުމަތިން ވަނީ ހަމަލާތައް ހުއްޓާލުމާ ބެހޭ ގަރާރަކާ މެދު އެއްބަސްވުމަކަށް އާދެވޭތޯ އެކި ގޮތްގޮތަށް މަސައްކަތްކޮށްފައިވީ ނަމަވެސް، ކޮންމެ ފަހަރަކު ވެސް ގަރާރު ފާސް ނުވެ ފެއިލްވަނީ ބައެއް ގައުމުތަކުން، ގަރާރުގެ ބަސްމަގާ މެދު ހިތްހަމަނުޖެހޭތީ އެވެ.
ޣައްޒާއަށް ދެމުންދާ ހަމަލާތައް ހުއްޓާލަން ގޮވާލައި މީގެ ކުރިން ހުށަހެޅި ގަރާރު އިޒްރޭލުގެ އެކުވެރި އެމެރިކާއިން ވީޓޯ ކުރިޔަސް މިފަހަރު ނިންމީ ވޯޓުގައި ބައިވެރި ނުވާށެވެ.
ގަރާރު ފާސްކުރުމާ އެކު އިޒްރޭލުން ވަނީ މިއީ ހަމާސްއާ ދެކޮޅަށް ކުރާ ހަނގުރާމާގައި އިޒްރޭލަށް ދިން ދެރައެއްގެ ގޮތުގައި ސިފަކޮށް އެކަމާ ނުރުހުން ފާޅުުކުރުމުގެ ގޮތުން އިޒްރޭލުން ވަނީ ހަމަލާތައް ހުއްޓުމާ ބެހޭ ގޮތުން މަޝްވަރާކުރުމަށް އިޒްރޭލުން އެމެރިކާއަށް ކުރަން އޮތް ދަތުރު ވެސް ކެންސަލްކޮށްފަ އެވެ.
