ފުލުހަށް ހާޒިރުކުރީ އަނިޔާވެރިވާ މަންޒަރު ދައްކައިގެން ރައްޔިތުން ބިރުގަންނުވަންކަމަށް އެމްޑީޕީގެ ޗެއާޕާސަން އަދި ކުރީގެ އެކޮނިމިކް މިނިސްޓާ ފައްޔާޒު އިސްމާއިލް ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ އޭނާއަށް ތުހުމަތު ކުރެވޭ އެއްވެސް ކަމެއް ކޮށްފަ ނޯންނާނެކަމަށާއި، ސިޔާސީ ބޭނުމަށް ފުލުހުންގެ އިދާރާ ބޭނުންކުރުމަކީ ފުލުހުންގެ އާންމު ވާޖިބު އަދާކުރުމަށް ހުރަސް އެޅޭނޭ ކަމެއް ކަމަށް ވިދާޅުވެފައެވެ.
ފައްޔާޒު މިފަދައިން ވިދާޅުވެފައި ވާއިރު، ފައްޔާޒް ފުލުހަށް ހާޒިރު ކުރުމަކީ ސިޔާސީ މަގުސަދެއްގައި ކުރާ ކަމެއްގެ ގޮތުގައި އެމްޑީޕީގެ ރައީސް އަބްދުﷲ ޝާހިދުވެސް ވަނީ ވިދާޅުވެފައެވެ.
މިއީ ސިޔާސީ މަގުސަދެއްގައި ކުރާ ކަމެއް ކަމަށް ސިފަ ކުރައްވާ ޝާހިދު ވިދާޅުވީ ކުރިއަށް އޮތް ރައްޔިތުންގެ މަޖިލީހުގައި މެޖޯރިޓީ ނުލިބުމުގެ ބިރު ސަރުކާރަށް އެބައޮތް ކަމަށެވެ.
އިދިކޮޅު ލީޑަރުންނާއި މެންބަރުންނަށް ސިޔާސީ ގޮތުން ފުރައްސާރަކުރުމާއި ބިރުދެއްކުން މިހާރުން މިހާރަށް ހުއްޓާލަން ޖެހޭ ކަމަށް ޝާހިދު ވަނީ ވިދާޅުވެފައެވެ. އަދި މަޖިލިސް އިންތިހާބު ބާއްވަން ޖެހޭނީ ބިރުވެރިކަމާއި ބަދަލު ހިފުމާއި ބިރުދެއްކުމުން އެއްކިބާވެފައިވާ މާހައުލެއްގައި ކަމަށް ވެސް ޝާހިދު ވަނީ ވިދާޅުވެފައެވެ.
ފުލުހަށް ހާޒިރުވާން ފައްޔާޒަށް ފޮނުވި ޗިޓުގައި އޭނާއަށް ކުރެވޭ ތުހުމަތުގެ ގޮތުގައި އޮތީ، އާރްޑީސީއަށް ލިބޭ ފައިސާ އެ ކުންފުނީގެ ވެރިންނާއި އެ ކުންފުންޏާ ގުޅުން އޮންނަ ފަރާތްތަކަށާއި ކުންފުނިތަކަށް ދޫކޮށް، އާރްޑީސީގެ ފައިސާއަށް ޚިޔާނާތްތެރިވެފައިވާ މައްސަލައިގައި އެ ކުންފުނިން ކޮށްފައިވާ މުއާމަލާތްތަކުގެ ތެރެއިން ފައްޔާޒަށް މާލީ މަންފާ ލިބިފައިވާ ކަމަށް ތުހުމަތު ކުރެވޭ ކަމަށެވެ.
