ރައްޔިތުންގެ މަޖިލީހުގެ އިންތިހާބަށް ޕްރޮގްރެސިވް ކޮންގްރެސް ކޯލިޝަންގެ ޗީފް ސްޕޯކްސްޕާސަންގެ މަގާމަށް ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ ސީއީއޯ ހީނާ ވަލީދު ހަމަޖައްސައިފިއެވެ.
އެކްސްގައި ރޭ ކުރި ޕޯސްޓެއްގައި ޕީއެންސީން ބުނީ މަޖިލިސް އިންތިހާބުގެ ކަންކަމުގައި ޕްރޮގްރެސިވް ކޮންގްރެސް ކޯލިޝަން ތަމްސީލުކުރައްވާ ޗީފް ސްޕޯކްސްޕާސަންގެ މަގާމަށް ހީނާ އައްޔަންކުރައްވާފައިވަނީ އިއްޔެ ކަމަށެވެ.
ހީނާ އަކީ އެންސްޕާގެ ސީއީއޯއަށް ވާއިރު، އެ މަގާމާ ހަވާލުވެވަޑައިގެންނެވުމުގެ ކުރިން ވެސް ޕްރޮގްރެސިވް ކޮންގްރެސް ކޯލިޝަންގެ ޗީޕް ސްޕޯކްސްޕާސަނަކީ ހީނާއެވެ. އަދި 2019 ވަނަ އަހަރުގެ އޭޕްރީލް މަހުން ފެށިގެން ޕީއެންސީގެ ސްޕޯކްސްޕާސަންގެ މަގާމު ވެސް އަދާކުރައްވަމުން ގެންދެވީ ހީނާއެވެ.
އަންނަ މަހުގެ 21 ވަނަ ދުވަހު ބާއްވާ މަޖިލިސް އިންތިހާބުގައި އެންމެ ގިނަ ކެންޑިޑޭޓުން ވާދަކުރަނީ ޕީއެންސީންނެވެ. އެ ޕާޓީން 89 ކެންޑިޑޭޓަކު ވާދަކުރާ އިރު، އިދިކޮޅު އެމްޑީޕީން 82 ކެންޑިޑޭޓަކު ވާދަކުރެއެވެ. ދެން ހިމެނެނީ ދަ ޑިމޮކްރެޓްސްގެ 39 ކެންޑިޑޭޓަކާއި ޖުމްހޫރީ ޕާޓީގެ 10 ކެންޑިޑޭޓަކާއި އަދާލަތު ޕާޓީގެ ހަތަރު ކެންޑިޑޭޓަކާއި އެމްޑީއޭގެ ހަތަރު ކެންޑިޑޭޓަކާއި އެމްއެންފީގެ ދެ ކެންޑިޑޭޓެއްގެ އިތުރުން އަމިއްލަ ގޮތުން ވާދަކުރާ 130 ކެންޑިޑޭޓުންންނެވެ.
މަޖިލީސް އިންތިހާބު ފުރަަތަމަ ތާވަލު ކުރީ މާޗް މަހުގެ 17 ވަނަ ދުވަހަށް ނަމަވެސް އެއީ ރޯދަ މަހާ ދިމާވާތީ ރޯދަ މަސް ނިމޭތާ 10 ދުވަސް ފަހުން އިންތިހާބު ބާއްވަން ޖެހޭ ގޮތަށް އިންތިހާބުތަކާ ބެހޭ ގާނޫނަށް ބަދަލު ގެންނަން ހުށަހެޅި ބިލް މަޖިލީހުން ވަނީ ފާސްކޮށްފައެވެ. އެ ބިލު ތަސްދީގު ކުރެއްވުމާއެކު މަޖިލިސް އިންތިހާބު އޭޕްރީލް 21 ވަނަ ދުވަހު ބޭއްވުމަށް އިލެކްޝަން ކޮމިޝަނުން ވަނީ ނިންމާފައެވެ.
