މިދިޔަ ރިޔާސީ އިންތިހާބުގެ ކެމްޕެއިނުގެ ދުވަސްވަރު މޯލްޑިވިއަންގެ ފްލައިޓުތަކުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކޮށްފައިވާ ދަތުރުތަކަށްނުދައްކާ ހުރި 5.6 މިލިއަން ރުފިޔާ ހޯދަން އެ ޕާޓީއާ ދެކޮޅަށް ސިވިލް ކޯޓުގައި މޯލްޑިވިއަނުން ދައުވާކޮށްފިއެވެ.
ގައުމީ އެއާލައިން މޯލްޑިވިއަން ހިންގާ، އައިލެންޑް އޭވިއޭޝަންގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވީ، އެމްޑީޕީގެ ބޭނުންތަކަށް އެ ކުންފުނިންނަގާފައިވާ ޓިކެޓާއި ޗާޓަރު ފްލައިޓްތަކަށް ނުދައްކާ ހުރި 5.6 މިލިއަން ރުފިޔާ ހޯދަން ސިވިލް ކޯޓަށް މައްސަލަ ހުށަހަޅާފައިވާ ކަމަށެވެ.
މައްސަލަ ހުށަހެޅުމުގެ ކުރިން އެ ފައިސާ ހޯދަން ވަރަށް ގިނަ ފުރުސަތު ލިޔުމުންދީ، އެ ފައިސާ ނުދައްކައިފި ނަމަ ޝަރުއީ މަރުހަލާތައް ފަށާނެ ކަމަށްއެމްޑީޕީއަށް އަންގާފައިވާނެ ކަމަށްވެސް ވިދާޅުވިއެވެ.
