ފުވައްމުލަކުގައި 12 ހެކްޓަރުގެ ޓޫރިޒަމް ޒޯނެއް ތަރައްގީކުރުމަށް ސިޓީ ކައުންސިލާއި ރީޖަނަލް އެއާޕޯޓްސް ކޮމްޕެނީ އެއްބަސްވުމެއްގައި ސޮއިކޮށްފިއެވެ.
ފުވައްމުލައް ސިޓީ ކައުންސިލްގެ ފަރާތުން އެއްބަސްވުމުގައި ސޮއި ކުރެއްވީ މޭޔަރު އިސްމާއީލް ރަފީގުއެވެ. އަދި ރީޖަނަލް އެއާޕޯޓްސްގެ ފަރާތުން އެއްބަސްވުމުގައި ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އަހްމަދު މުބީންއެވެ.
މޭޔަރު އިސްމާއީލް ރަފީގު ވިދާޅުވީ ދެ އަހަރު ދުވަހުގެ މި އެއްބަސްވުމުގެ ދަށުން 12 ހެކްޓަރުގެ ބިމުގައި ފަތުރުވެރިކަން ތަރައްގީކުރުމަށް އިންވެސްޓަރުން ހޯދުމާއި، މަޝްރޫއުގެ ޑިޒައިން މަސައްކަތްތައް ސިޓީ ކައުންސިލާ ގުޅިގެން ކުރިއަށް ގެންދާނީ ރީޖަނަލް އެއާޕޯސް ކުންފުނިން ކަމަށެވެ.
މަޝްރޫއު ކުރިއަށް ގެންދިއުމަށް ބިން ހަމަޖައްސާފައިވަނީ ފުވައްމުލައް އެއާޕޯޓާ އިންވެގެން އޮންނަ ހުސް ބިން “ބިޅިފޭށި” ސަރަހައްދުންނެވެ. އިންވެސްޓަރެއް ލިބި މިއަހަރު މިމަޝްރޫއު ފެށުމަކީ އަމާޒެއް ކަމަށާއި މި މަޝްރޫއު ނިމެންވާއިރަށް ފުވައްމުލަކު އެއާޕޯޓް އިތުރަށް ތަރައްގީ ކުރެވި އެ ސިޓީއަށް ފްލައިޓްތައް އިތުރުކޮށް އަދި ފަތުރުވެރިން އިތުރުކުރެވޭނެ ގޮތްތައް ހަމަޖެހިގެންދާނެ ކަމަށް އުއްމީދު ކުރައްވާ ކަމަށް މޭޔަރު ވަނީ ވިދާޅުވެފައެވެ.
