ވައިގެ ދަތުރުފަތުރުގެ އުސޫލުތަކާއި ހިލާފަށް ކަމެއް ކުރާކަން ފާހަގަވެއްޖެ ނަމަ އެކަން ވަގުތުން ރިޕޯޓްކުރުމަށް ހާއްސަ އޮންލައިން ޕްލެޓްފޯމެއް ސަރުކާރުން ތައާރަފްކޮށްފި އެވެ.
ސަރުކާރުން ތައާރަފްކޮށްފައިވާ އެ ޕްލެޓްފޯމްގެ ނަމަކީ “އޭވިއޭޝަން ސެކިއުރިޓީ ކޮންފިޑެންޝިއަލް ރިޕޯޓިން ސިސްޓަމް” އެވެ. އެ ޕްލެޓްފޯމް ތައާރަފް ކުރީ ޑިފެންސް މިނިސްޓްރީގެ ދަށުން ހިންގާ ޑިރެކްޓްރޭޓް އޮފް އޭވިއޭޝަން ސެކިއުރިޓީ އެޑްމިނިސްޓްރޭޝަން (ޑާސާ) އިންނެވެ.
ޑިފެންސް މިނިސްޓްރީން މިއަދު އާންމުކުރި ސާކިއުލާއެއްގައި ވަނީ ރާއްޖޭގެ މަދަނީ ވައިގެ ދަތުރުފަތުރުގެ ރައްކާތެރިކަން ކަށަވަރުކުރުމަށް ކުރަމުން އަންނަ މަސައްކަތުގެ ތެރެއިން، ވައިގެ ދަތުރުފަތުރުގެ ރައްކާތެރިކަމަށް ނުރަނގަޅު އަސަރެއްކޮށްފާނެ ކަަމަށް ބެލެވޭ ކަމެއް ނުވަތަ ހެދިފައިވާ ގަވާއިދުތަކާއި އުސޫލުތަކާ ހިލާފު ކަމެއް އެއާޕޯޓްތަކުގައި ނުވަތަ ފްލައިޓްތަކުގައި ހިނގާނަމަ އެކަން ރިޕޯޓްކުރެވޭނެ ނިޒާމެއް މިހާރު ގާއިމްކޮށްފައިވާ ކަމަށެވެ.
އޭވިއޭޝަންއާ ގުޅުންހުރި ރާއްޖޭގެ ހުރިހާ އިދާރާއަކަށް މި ސާކިއުލާ ވަނީ މިދިޔަ ހަފުތާގައި ފޮނުވައިފަ އެވެ.
ޑިފެންސް މިނިސްޓްރީންގެ ފަރާތުން ބުނެފައިވަނީ މި ޕްލެޓްފޯމް ފަރުމާކޮށްފައި ވަނީ ރިޕޯޓް ކުރާ ފަރާތް ބޭނުންވެއްޖެ ހާލަތެއްގައި އެ މީހެއްގެ މައުލޫމާތު ހާމަނުކޮށް ވެސް މައްސަލަ ރިޕޯޓްކުރެވޭނެ ގޮތަށް ކަމަށެވެ.
މިދިޔަ އާދިއްތަ ދުވަހުން ފެށިގެން މި ޕްލެޓްފޯމް ލައިވްކޮށް، އާންމުންނަށް ބޭނުންކުރެވޭނެ ގޮތް ހަދާފައިވާ ކަމަށް ވެސް މިނިސްޓްރީން ބުންޏެވެ.
