އައްޑޫ ޓޫރިޒަމްގެ ބޮދު ހިއްސާއެއް ކަމަަށްވާ ހަންކެޑެ ރިސޯޓު ތަރައްގީ ކުރުމުގެ މަޝްރޫއުގެ ހުރިހާ ކަމެއް ހަމަޖެހިފައި އޮތް ނަމަވެސް, މަސައްކަތް ނުފަށާތީ, އެ މަޝްރޫއުގެ ނަން މި ސަރުކާރުން ބޭނުންވާ ގޮތަކަށް ބަދަލުކޮށްގެން ވިޔަސް ފަށަން, އެމްޑީޕީގެ ޗެއާޕާސަން ފައްޔާޒް އިސްމާއިލް ސަރުކާރަށް ގޮވައިލައްވައިފިއެވެ.
ފައްޔާޒް މިފަދައިން ވިދާޅުވެފައި ވަނީ ކުރިޔަށް އޮތް ރައްޔިތުންގެ މަޖިލީހުގެ އިންތިހާބަށް އައްޑޫ ސިޓީއަށް ވާދަކުރައްވާ އެމްޑީޕީގެ ކެންޑިޑޭޓުންގެ ތަރާވީހުގައި ވާހަކަދައްކަވަމުންނެވެ. އެގޮތުން ފައްޔާޒު ވިދާޅުވީ ކުރީގެ ރައީސް އިބްރާހީް މުހައްމަދު ސޯލިހުގެ ސަރުކާރުން ވަނީ އައްޑުއަށް 500 މިލިއަނާ ގާތަށް އިންވެސްޓު ކޮށްފައިކަމަށާއި އައްޑޫގެ ތަރައްގީއަށް އެންމެ މުހިންމު އެއް ކަމަކީ ޓޫރިޒަމްކަމަށެވެ.
ހަންކެޑައިގެ 1000 އެތައް ކޮޓަރިއެއް އެޅުމަށް ޑިޒައިންކޮށް, ކޮންޓްރެކްޓަރު ހޯދައި, ކޮންޓްރެކްޓަރާ އެއްކޮށް ސޮއިކޮށް, ޗައިނާ މާޗަންޓް ބޭންކާ އެއްކޮށް އެގްރީމަންޓުގައި ސޮއިކޮށް ހުރިހާ ކަމެއް ނިންމާފައި އެ އޮތީ. ފަސް މަސް ދުވަސް ވެގެންދާއިރުގައި އަދިވެސް އެކަން ފަށައިނުގަނެވިގެން މިއުޅެނީ. 145 މިލިއަން ޑޮލަރުގެ ހަންކެޑައިގެ ޕްރޮޖެކްޓުގައި އަޅުގަނޑުމެން އޮންނާނީ ސޮއިކޮށްފައި, ފައިނޭންސް ހޯދައި, ހުރިހާ ކަމެއް ނިންމާފައި–ފައްޔާޒު
ފައްޔާޒު ވިދާޅުވީ ރައީސް މުޢިއްޒު ވެރިކަމާއި ހަވާލުވެވަޑައިގެންނެވިތާ ފަސްމަސް ދުވަހަށް ވުރެ ގިނަ ދުވަސްވެފައިވާއިރު އަދިވެސް އެ މަަޝްރޫއުގެ މަސައްކަތް ފެށިފައި ނުވާ ކަމަށެވެ. އެހެންވެ ފައިނޭންސް ވެސް ހޯދައި ހުރިހާ ކަމެއް ނިމިފައި އޮތް 145 މިލިއަން ޑޮލަރުގެ އެ ޕްރޮޖެކްޓް މަސައްކަތް ވީހާ އަވަހަކަށް ފެށުމަށް ފައްޔާޒު ވަނީ ސަރުކާރަށް ގޮވާލައްވައިފައެވެ.
ހަންކެޑެ މަޝްރޫއު ހަވާލުކޮށްފައި ވަނީ ޗައިނާ ނޭޝަނަލް އިލެކްޓްރިކަލް އިންޖިނިއަރިން (ސީއެންއީސީސީ) އެވެ. ހަންކެޑެ ތަރައްގީ ކުރަން މޯލްޑިވްސް ފަންޑް މެނޭޖްމަންޓް ކޯޕަރޭޝަން ކޮމްޕެނީ (އެމްއެފްއެމްސީ) އާއި ސީއެންއީސީސީއާ ދެމެދު ސޮއިކުރީ މިދިޔަ އަހަރުގެ މާޗް 30 ގައެވެ.
