ކުރީގެ ރައީސް އަބްދުﷲ ޔާމީން، ޕީޕަލްސް ނެޝަނަލް ފްރަންޓް (ޕީއެންއެފް) އުފެއްދުމަށް ބާއްވާ ޖަލްސާގައި ބައިވެރިވެ ވަޑައިގަތުމުގެ ހުއްދައަށް އެދިވަޑައިގެންފިއެވެ.
މި ޖަލްސާ ބޭއްވުމުގެ ހުއްދަ އީސީއިން ދީފައިވަނީ މިދިޔަ ބުރާސްފަތި ދުވަހުއެވެ. ޕީއެންއެފް އުފެއްދުމުގައި އިސްކޮށް މަސައްކަތް ކުރަށްވާ ކުރީގެ ޓެލެކޮމް މިނިސްޓަރ މުހައްމަދު މަލީހު ޖަމާލު ވިދާޅުވީ، ޔާމީން މިނިވަން ކުރުމުގެ ވައުދުގެ މަތީގައި ދެމި ހުންނެވި ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާ ކަމަށެވެ.
އެހެންކަމުން، ޕީއެންއެފް އުފެއްދުމުގެ ޖަލްސާގައި ރައީސް ޔާމީން ބައިވެރިވުމުގެ ހުއްދައަށް އެދި އެމަނިކުފާނުގެ ގާނޫނީ ޓީމުގެ ފަރާތުން ސިޓީ ފޮނުވާފައި ވާނެ ކަމަށް މަލީހު ވިދާޅުވިއެވެ.
ސިޔާސީ ޕާޓީގެ ގާނޫނުގައި ބަޔާންކުުރާ މުއްދަތު ހަމަވާން ދެ ދުވަހަށްވެފައިވަނިކޮށް ޕީއެންއެފްއިން 3070 ފޯމު އީސީއަށް ހުށަހެޅީ މިދިޔަ މަހުގެ 27 ވަނަ ދުވަހެވެ. އެ ޕާޓީ އުފެއްދުމުގެ ހުއްދައަކަށް އެދި އީސީއަށް ހުށަހަޅާފައިވަނީ މިދިޔަ ނޮވެންބަރު މަހުގެ 26 ވަނަ ދުވަހު ކަމަށްވާއިރު އީސީއިން އެ ޕާޓީ އުފެއްދުމުގެ ހުއްދަ ދީފައިވަނީ އެ މަހުގެ 29 ވަނަ ދުވަހެވެ.
ރައީސް ޔާމީންގެ ދަރިކަލުން ޒެއިން އަބްދުﷲ ޔާމީންގެ ނަމުގައި އުފައްދާ ޕީއެންއެފް އުފެއްދުމުގައި އިސްކޮށް ހަރާކާތްތެރިވަނީ ރައީސް ޔާމީންގެ އިސް ވަކީލް ޑރ. މުހައްމަދު ޖަމީލް އަހްމަދު، މުހައްމަދު މަލީހް ޖަމާލުއެވެ.
ޕާޓީގެ މުއައްސިސްގެ ގޮތުގައި ރައީސް ޔާމީން ހިމެނިވަޑައިގަންނަވާހެން 8 ބޭފުޅުން ހަމަޖެއްސުމަށް ވަނީ ނިންމާފައެވެ. އެގޮތުން ޔާމީންގެ އިތުރުން މުއައްސިސުންގެ ގޮތުގައި ތިއްބަވާނީ ޑރ. މުހައްމަދު ޖަމީލު އަހުމަދު, ކުރީގެ ސީޕީ ހުސައިން ވަހީދު, މުލިއާގޭގެ ޗީފް އޮފް ސްޓާފް އަހުމަދު މުސްތަފާ, އަދްލީ އިސްމާއީލް، ޑރ. ޖިހާދު ހަސަން، ކަކާގޭ އަލީ އާދަމް އަދި ޔާމީންގެ ދަރިކަލުން ޒެއިންއެވެ.
