ޖުމްހޫރީ މޭވާއަކީ ދިވެހިރާއްޖޭގައި ވަރަށް އާންމުކޮށް ކައިއުޅޭ މޭވާއެކެވެ. ނަމަވެސް އާންމުކޮށް މީހުން ކައި އުޅެނީ ހަމައެކަނި މި ގަހުގެ މޭވާއެވެ. ވަރަށް ގިނަމީހުންނަށް މި ގަހުގެ ފަތަކީ ވެސް ކެވިދާނެ އެއްޗެއްކަން ނޭނގެއެވެ. އަދި މިގަހުގެ ފަތުން ކުރާ ފައިދާއެއް ވެސް ނޭނގެއެވެ. މޭވާ ފަދައިން ޖުމްހޫރީ މޭވާގެ ފަތްތައް ވެސް ކެވިދާނެ އެވެ. އެހެންކަމުން ޖުމްހޫރީ މޭވާ ގަހުގެ ފަތްތަކުން ލިބޭ ފައިދާތަކަށް ބަލާލަމާ ހިނގާށެވެ.
1. ލޭގެ ޕްރެޝަރާއި ލޭގެ ލިޕިޑްސް ދަށްކުރުން
ޖުމްހޫރީ މޭވާ ގަހުގެ ފަތްތަކުން ލޭގެ ޕްރެޝަރާއި ލޭގެ ލިޕިޑްސް ދަށްކޮށްދެއެވެ. މީގެ އިތުރުން މިފަތަކީ ކޮލެސްޓްރޯލް ވަރަށް ކުޑަ މިންވަރަކަށް ހިމެނޭ ފަތެކެވެ. އަދި މިގަހުގެ ފަތުގައި އެކުލެވިގެންވާ މާއްދާތަކުން ހަށިގަނޑުން ފެޓް ދަށްކޮށްދެއެވެ. އަދި ވަކިން ހާއްސަކޮށް މި ފަތުގައި އެކުލެވިގެންވާ ޕޮޓޭސިއަމް އިން ހިތުގެ ބަލިތަކުން ރައްކާތެރިވުމަށް އެހީވެދެއެވެ.
2. ހަންގަނޑު އޮމާންވެ ރީތިވުން
ޖުމްހޫރީ މޭވާ ގަހުގެ ފަތްތަކުން އިންސާނާގެ ހަށިގަނޑުގައި ހުންނަ ސުޕައޮކްސައިޑް ޑިސްމިއުޓޭޒްގެ ހަރަކާތް ރަނގަޅުކޮށްދެއެވެ. އަދި ހަމުގެ އެންޓިއޮކްސިޑެންޓް ކެޕޭސިޓީ އިތުރުކޮށްދެއެވެ. މީގެ އިތުރުން ހަންގަނޑުގެ ސަރަޙައްދުގައި ޕިގްމަންޓް ޖަމާވުން ހުއްޓުވައި، ކުލަ ތައް އުފެދުން ހުއްޓުވައިދެއެވެ. މޫނުގައި ކުލަކުލައިގެ ސްޕޮޓްތައް ހުންނަ މީހުންނަށް މިފަދަ ސްޕޮޓްތައް މަދުކުރުމަށް ޖުމްހޫރީ މޭވާ ގަހުގެ ފަތަކީ ވަރަށް ރަނގަޅު ފަރުވާއެކެވެ.
3. ގޮހޮރު ސާފުކުރުމާއި، ޑީޓޮކްސިފައިކުރުމާއި، އަދި ފާހާނާކުރުމަށް އެހީތެރިވެދިނުން
ޖުމްހޫރީ މޭވާ ގަހުގެ ފަތްތަކުގައި ގިނަ އަދަދަކަށް ސެލިއުލޯޒް، ބައެއް ޑައިޓްރީ ފައިބާ އަދި ޕެކްޓިން އެކުލެވިގެންވެއެވެ. މި މާއްދާތަކުގެ ސަބަބުން ގެސްޓްރޮއިންޓެއިންޓައިނަލް ޕެރިސްޓަލްސިސް އަށް މަގުފަހިކޮށްދެއެވެ. ޖުމްހޫރީ މޭވާ ގަހުގެ ފަތް ބޭނުންކުރުމުން، ހަށިގަނޑުގައި ގިނައިރު ފެން ހިފަހައްޓައި ހަކަތަ އިތުރުކުރުމުގެ އިތުރަށް ގޮހޮރުގައި ހުންނަ ކުނިތަކާއި ވިހަ މާއްދާތައް ހަށިގަނޑުގެ މެޓަބޮލިޒަމްއާ އެކު ބޭރުކުރުމަށް އެހީތެރިވެދެއެވެ.
4. ބަރުދަން ލުއިކުރުން
ޖުމްހޫރީ މޭވާ ގަހުގެ ފަތަކީ ކެލޮރީ މަދު ކާނާގެ ބާވަތެކެވެ. އަދި މިފަތުގައި ހިމެނޭ ސެލިއުލޯޒްގެ ސަބަބުން ބަނޑަށް ރައްކާތެރިކަން ލިބި، ހަށިގަނޑުގައި ކެލޮރީޒް އުފެދޭ މިންވަރު މަދުކޮށްދެއެވެ. މީގެ އިތުރުން ޕެޝަން ފްރުޓް ފަތް ކެއުމުން ކޮލެސްޓްރޯލް ހަށިގަނޑަށް ޖަމާވިޔަ ނުދީ، ކޮލެސްޓްރޯލް ބައިލްއަށް ބަދަލުކުރުމަށް މަގުފަހިކޮށްދީ ވީހާވެސް އަވަހަކަށް ހަށިގަނޑުން ބޭރުކޮށްދެއެވެ.
5. ލޮލުގެ ފެނުން ރަނގަޅުވުން
ޖުމްހޫރީ މޭވާ ގަހުގެ ފަތްތަކުގައި ބީޓާ ކެރޮޓީން އެކުލެވިގެންވާ އިރު، މިއީ ވިޓަމިން އޭ އަށް ބަދަލުވާ މާއްދާއެކެވެ. ވިޓަމިން އޭ އަކީ އިންސާނާގެ ލޮލުގެ ފެނުމަށް އެންމެ މުހިއްމު ވިޓަމިންއެކެވެ. އެހެންކަމުން މިފަތް ކެއުމުން ލޮލުގެ ފެނުން ރަނގަޅުވެ ލޮލުގައި ކެޓަރެކްޓް، ގްލޮކޯމާ އަދި މަޔޯޕިއާ ފަދަ ބަލިތައް ޖެހުމުގެ ފުރުސަތު ކުޑަވެގެން ދެއެވެ. ކުޑަކުދިންނާއި އުމުރުން ދުވަސްވީ މީހުންނަށް ޕެޝަން ފްރުޓް ފަތް ކެއުމަކީ މިސަބަބަށްޓަކައި މާ އެކަށީގެންވާ ކަމެކެވެ.
