މަސައްކަތުގެ މާހައުލުގައި އެންޝިއަސްވުން ނުވަތަ ކަންބޮޑުވާނަމަ އާންމުކޮށް ދިމާވާ ކަންކަމަކީ، މަސައްކަތާއިމެދު ހިތް ނުތަނަވެސްވެ، ކަންބޮޑުވުން ނުވަތަ ބިރުގަތުން ފަދަ އަލާމާތްތައް ހުރުމެވެ. މަސައްކަތުގެ މާހައުލުގައި ނުވަތަ މަސައްކަތުން ބޭރުގައި ވެސް މިފަދަ އިހުސާސްތައް ކުރިމަތިވެދާނެއެވެ. މަސައްކަތުގެ މާހައުލުގައި ނުތަނަވަސްކަން އުފެދޭ ސަބަބުތަކުގެ ތެރޭގައި، އެހެން މުވައްޒަފުންނާއި އޮންނަ ގުޅުން ރަނަގަޅު ނުވުމާއި، މާގިނައިން މަސައްކަތް ކުރަންޖެހި މީހާ ބާރންއައުޓްވުމާއި، ވަޒީފާގެ ސަލާމަތާއި ރައްކާތެރިކަން ނުވަތަ މަސައްކަތުގެ މާހައުލުގައި ހުންނަ ނުރަނގަޅު ސަގާފަތްތައް ވެސް ހިމެނެއެވެ.

މަސައްކަތުގައި އެންޒައިޓީ މެނޭޖްކުރެވިދާނެ ގޮތްތައް:

1. މަސައްކަތް ރާވާލުން
ދުވަހުން ދުވަހަށް ކުރަން ހުންނަ މަސައްކަތަށާއި ހަފްތާތެރޭގައި ކުރަންހުރި މަސައްކަތްތައް ފާހަގަކޮށް ރާވާލުމަށް ވަގުތުކޮޅެއް ހުސްކޮށްލުމަށްފަހު ޕްލޭންކޮށްލާށެވެ. ރަނގަޅަށް ތަރުތީބުކުރެވިފައިވާ ޕްލޭނަކުން ތިމާގެ މަސައްކަތުގެ ކޮންޓްރޯލް އިހުސާސްކުރެވި، ކަންބޮޑުވުމުގެ އިހުސާސްތަކަށް ލުޔެއް ލިބިގެންދާނެއެވެ. އަދި ތިމާ ބޭނުންވާ އަދި ޙާޞިލުކުރަން ބޭނުންވާ މަސައްކަތްތަކުގެ ފުރިހަމަ ވިޒިބިލިޓީ ލިބިގެންދާނެއެވެ.

2. ކޮންމެ މަސައްކަތެއް މެނޭޖްކުރެވޭ ވަރަށް ކުޑަ ބައިތަކަކަށް ބަހާލުން
މިކަމުގެ ސަބަބުން ތިބާގެ ޓުޑޫ ލިސްޓުގެ ދިގުމިން އިތުރުވެދާނެއެވެ. ނަމަވެސް، ބޮޑެތި މަސައްކަތްތައް ކުދި އެކްޝަން ޕޮއިންޓްތަކަކަށް ބަހާލުމުން، ނިޒާމީ ގޮތުން މަސައްކަތް ކުރުމަށް މަގުފަހިވެގެންދާނެއެވެ. މިގޮތުން ބޮޑު ޕްރޮޖެކްޓް ނިންމުމަށް މަސައްކަތް ކުރަމުންދާއިރު ނިންމާލެވޭ މަސައްކަތްތައް ފާހަގަކުރުމަކީވެސް ވަރަށް ބޮޑު ކޮންފިޑެންސަކަށް ވެގެންދާނެ އެވެ.

3. ރިއަލިސްޓިކް ޑެޑްލައިންތައް ކަނޑައެޅުން
ޕްރޮޖެކްޓްތަކަށް ހާސިލްނުކުރެވޭ ސުންގަޑިތަކެއް ކަނޑައެޅުމަކީ ތިބާގެ ކަންބޮޑުވުން އިތުރުވެގެންދާނެކަމެކެވެ. ބޮޑެތި މަސައްކަތްތައް ބަހާލައިގެން، ޕްލޭނިން ސްޓޭޖްގައި ޕްރޮޖެކްޓަކަށް ނަގާނީ ކިހާ ދުވަހެއްކަން ބަލައި ރިއަލިސްޓިކް ތާރީޚްތައް ކަނޑައަޅާށެވެ.

4. އެހީއަށް އެދުން
އެހީއަށް އެދުމަކީ އެންޒައިޓީ ހުންނަ މީހަކަށް އުނދަގޫ ކަމަކަށް ވެދާނެއެވެ. ތިބާއަކީ ނާޤާބިލު މީހެއްގެ ގޮތުގައި ދެކޭނެ ކަމުގެ ބިރު އޮންނާތީ ކަމަށް ވެދާނެއެވެ. ނަމަވެސް، ވޯކްލޯޑް މާ ބޮޑުވެއްޖެނަމަ، ނުވަތަ ޕްރޮޖެކްޓެއްގައި ކުޑަ އެއްބާރުލުމެއް ބޭނުންވާނަމަ، ޓީމުގެ އެހެން ބައިވެރިންގެ އެހީތެރިކަށް އެދޭށެވެ.

5. ކަންބޮޑުވުން ކުރިމަތިވާނެކަން ޤަބޫލުކުރުން
ކޮންމެ މީހަކީވެސް އެކި ފަހަރު މަތިން އެންޒައިޓީ ތަޖުރިބާކުރާ މީހެކެވެ. މީހުންނަށް ސްޓްރެސް އިހުސާސް ކުރެވޭއިރު، މިފަދަ އިޙްސާސްތަކަކީ ޤުދުރަތީ ގޮތުން އިންސާނުންގެ އިޖާބައެވެ. އެންޒައިޓީ ޑިސްއޯޑާ ހުންނަ މީހުންނަށް، އެހެން މީހުންނަށް ވުރެ ބޮޑަށް ނުވަތަ ގިނަ ފަހަރަށް އެންޒައިޓީ ތަޖުރިބާ ކުރެވެއެވެ. މިފަދަ ވަގުތުތަކުގައި އެންޒައިޓީ މެނޭޖްކުރުމަށް އެހީތެރިވުމުގެ ގޮތުން ކޯޕިން ސްޓްރެޓެޖީތައް ގެންގުޅެންޖެހެއެވެ. ޕްރޮފެޝަނަލް ސަޕޯޓާއި ތެރަޕީގެ އެހީގައި މިފަދަ ކޯޕިން ހުނަރުތައް ކުރިއެރުވުމަށް މަސައްކަތްކުރާށެވެ.