ސަސްޓެއިނެބިލިޓީ ނުވަތަ ދެމެހެއްޓެނިވި އާދަތަކަކީ އަޅުގަނޑުމެންގެ ދިރިއުޅުމުގައި މިހާރު ކޮންމެހެން އަށަގަންނުވަންޖެހޭ އާދަދަތަކެކެވެ. އެގޮތުން މިލިޔުމުގައި މިބަލާލަނީ ކޮފީ ބުއިމުގައި ބޭނުންކުރެވިދާނެ ސަސްޓެއިބިލިޓީ އަށް މަގުފަހިކޮށްދޭ ކަންކަމަށެވެ.
1. ކޮފީ ޕްރެސް ނުވަތަ މޮކާ ޕޮޓެއް ބޭނުންކުރުން
ޕްރެސް އެއް ނުވަތަ ޕޮޓަކީ އެތައް އަހަރެއް ވަންދެން ގެންގުޅެވިދާނެ އެއްޗެކެވެ. ރަނގަޅު ޒަމާންވީ ފްރެންޗް ޕްރެސް ނުވަތަ މޮކާ ޕޮޓެއް ބޭނުންކުރާއިރު ބޭނުންވަނީ ހޫނު ފެނާއި ކޮފީ ގްރައުންޑް އެކަންޏެވެ. ޕްރެސް ނުވަތަ ޕޮޓަކީ އޭގެ ބަދަލުގައި ބޭނުންކުރެވޭ ކަރަންޓު ވަސީލަތްތަކަށްވުރެ މަދުން ހަކަތަ ބޭނުންކުރާ، ބޭނުންކުރަން ފަސޭހަ، ފިލްޓަރ ބޭނުންކުރަން ނުޖެހޭ ދެމެހެއްޓެނިވި އިޙްތިޔާރަކަށް ވާނެއެވެ.
2. ފެއަރ ޓްރޭޑް އިޙްތިޔާރުކުރުން
ފެއަރ ޓްރޭޑަކީ ތަރައްޤީވަމުން އަންނަ ޤައުމުތަކުގެ ދަނޑުވެރިންނަށް އެފަރާތްތަކުގެ ދަނޑުވެރިކަމަށް އެކަށީގެންވާ އަގެއް ވިޔަފާރިތަކުން ދޭންޖެހޭ އެތިކަލް ސެޓްފިކެޓެކެވެ. މިފަދަ ބްރޭންޑްތަކުން ދަނޑުވެރިކަން ކުރުމުގައި ތިމާވެއްޓާއި ރައްޓެހި އާދަތައް ގެންގުޅުމަށް ބާރުއަޅައި ދެމެހެއްޓެނިވި ސަޕްލައި ޗެއިން އެއް ބިނާކުރުމަށް ބާރުއަޅައެވެ.
ކޮފީއަކީ އޭގެ އަގު، އަހަރުން އަހަރަށް ވަރަށް ބޮޑަށް ތަފާތުވާ އެއްޗެކެވެ. މީގެ މައިގަނޑު ސަބަބެއްގެ ގޮތުގައި ކަމާއިބެހޭ މާހިރުން ފާހަގަކުރަނީ މުސުމަށް އަންނަ ބަދަލުތަކެވެ. ފެއާ ޓްރޭޑް ކޮފީ ގަތުމަކީ މިކަމުގެ ނޭދެވޭ އަސަރުތަކުން އަރައިގަތުމަށް އިންވެސްޓް ކުރުމަށް އެހީތެރިވެދޭނެ ކަމެކެވެ.
3. ރީޔޫސަބަލް ތަށްޓެއް ބޭނުންކުރުން
ޓޭކްއަވޭ ކަޕަކީ ގިނައިން ކަރުދާހުން ހަދާފައި ހުންނަ ތަށިތަކެއް ކަމުން، މިތަށިތަކަކީ ރީސައިކަލް ކުރެވޭ އެއްޗެއް ކަމަށް އަޅުގަނޑުމެން ވަރަށް ގިނަ މީހުންނަށް ހީވިޔަސް، މި ތަށިތައް ހަލާކުވެގެން ދާން އެތައް އަހަރެއް ނަގައެވެ. އެއީ މި ތަށިތައް އުފެއްދުމަށް ބޭނުންކުރާ ކަރުދާހުގައި ހިމެނޭ ޕޮލިއެތިލީން ނަމަކަށް ކިޔާ ޕްލާސްޓިކްގެ ސަބަބުންނެވެ.
ކީޕްކަޕް ނުވަތަ އެހެން ރީޔޫޒަބަލް ކޮފީ ތަށްޓެއް ބޭނުންކުރަން ފެށުމުން ތިމާވެށީގެ ޚަރަދަކާއި ނުލައި ޓޭކްއަވޭ ކޮފީއަކުން ލިބޭ ހުރިހާ މީރު ފައިދާއެއް ލިބޭނެއެވެ.
4. ކޮފީ ގްރައުންޑް ކޮމްޕޯސްޓް ކުރުން
ކޮފީއަކީ މީރު ބުއިމަކަށް ވުމުގެ އިތުރުން، ކޮފީއަކީ ގަސްގަހާގެހީގެ ސިއްހަތަށް ފައިދާހުރި ނައިޓްރޯޖަން، ފޮސްފަރަސް، ޕޮޓޭސިއަމް އަދި އެހެނިހެން ޓްރޭސް މިނަރަލްސް ގިނަ އަދަދަކަށް އެކުލެވިގެންވާ އެއްޗެކެވެ. ބެލެވޭގޮތުގައި ކޮންމެ އަހަރަކު ވެސް ދުނިޔޭގެ އެކި ކަންކޮޅުތަކުގައި ގާތްގަނޑަކަށް ހަ މިލިއަން ޓަނުގެ ކޮފީ ގްރައުންޑް ވޭސްޓް އުފެދެއެވެ. ވީމާ ކޮފީ ގްރައުންޑް ޑަސްބިނަށް އެޅުމުގެ ބަދަލުގައި ކުނިކޮށިން ބޭރުން ބަގީޗާގައި ނުވަތަ ދަނޑުގައި ބޭނުންކުރުމަކީ ގަސްތަކަށާއި ތިމާއަށް ވެސް ފައިދާ ކުރާނެކަމެއްކަން ޔަޤީނެވެ.
5. ވިސްނުންތެރިކަމާއެކު ކޮފީ ޕޮޑްތައް ޚިޔާރުކުރުން
ކޮފީ ބޮވާ ކޮންމެ ފަހަރަކު ޑިސްޕޯސަބަލް ޕްލާސްޓިކާއި އެލުމިނިއަމް ޕޮޑެއް ބޭނުން ކުރުމަކީ ތިމާވެއްޓާ ކިހާ ރައްޓެހި ކަމެއް ހެއްޔެވެ؟ ކޮފީ ޕޮޑްތަކުގެ މަގުބޫލުކަން ހުރި ނަމަވެސް، އެ ހުރިހާ ޕޮޑްތަކެއް ނިމިގެންދަނީ ކުންޏަށެވެ. ބައެއް ކޮފީ އުފައްދާ ކުންފުނިތަކުން މިހާރު ކޮމްޕޯސްޓޭބަލް ކޮފީ ޕޮޑްތައް އުފައްދަމުން އަންނައިރު، ގާތްގަނޑަކަށް 180 ދުވަހުގެ ތެރޭގައި ހަލާކުވެ ގޮސްފައިވާ ކަމަށް ރިޕޯޓްތައް ބުނާ ޕޮޑްތައްވެސް މިހާރު ބާޒާރުގައި ލިބެން އެބަހުއްޓެވެ.
