ހަކުރު ނުވަތަ ފޮނި ކާއެއްޗިއްސާއި ނުލައި އަހަރުމެންގެ ކެއުންތައް ފުރިހަމަ ކުރުމަކީ ވަރަށް އުނދަގޫކަމެކެވެ. ކެއުމުގައި ހަކުރު ހިމެނޭ ހުރިހާ ބާވަތެއް އުނިކޮށްލުމަކީ ސިއްހީ މާހިރުންވެސް ދެކިލައްވާ ގޮތުގައި ރަނގަޅުކަމެއް ނޫނެވެ. އެކަމަކު ކެއުމުގައި ހަކުރުގެ ބާވަތްތައް ހިމެނޭ މިންވަރު މަދުކުރުމަކީ މިހާރު އަހަރެމެން އެންމެނެވެސް ކުރަންޖެހިފައި އޮތް ކަމެކެވެ.
“އެޑެޑް ޝުގަރ” ލޭބަލް އަށް ސަމާލުވުން
މިހާރުގެ ދިރިއުޅުމުގައި އަހަރެމެންނަށް ގަނެގެން ބޭނުންކުރާ ޕެކެޓްކުރި ކާތަކެއްޗާއި ނުލައި އުޅުމަކީ ވަރަށް އުނދަގޫ ކަމެކެވެ. ވީމާ މިފަދަ ތަކެތި ގަންނަ އިރު ސްމާރޓް ޗޮއިސް ނެގުމަކީ އަހަރެމެން ކޮންމެ މީހަކަށްވެސް ކުރެވިދާނެ ކަމެކެވެ. ސީރިއަލް ނުވަތަ ޔޯގަޓް ފަދަ ތަކެތި ގަތުމުގައިވެސް ތަފާތު ބްރޭންޑްތައް އަޅާކިޔާލާށެވެ. ހަކުރު އިތުރަށް އެޅިފައިވާ މިންވަރު ބަލައި، އެންމެ މަދުން ހަކުރު ހިމެނޭ ބާވަތްތައް އިޚްތިޔާރުކުރާށެވެ. އަދި މިތަކެތީގައި ހިމެނޭ ހަކުރުގެ މިންވަރަށް ބަލައި މުޅި ދުވަހު ކެވޭ އެއްޗިހީގައި ޖުމްލަކޮށް ހިމެނޭ ހަކުރުގެ މިންވަރު ކޮންޓްރޯލް ކުރެވޭނެއެވެ.
ހަކުރު ހިމެނޭ ބުއިންތަކާއި ދުރުވުން
ފިހާރަތަކުގައި އާންމުކޮށް ހުންނަ ބުއިންތަކުގެ ތެރެއިން ހަކުރު ގިނަ ތަކެތީގެ ގޮތުގައި އަހަރެމެން ލޭބަލްކުރަނީ ފިޒީ ޑްރިކްތަކެވެ. އެހެންކަމުން ކޮފީ ބުއިންތަކާއި އެނާޖީ ޑްރިންކްތަކުގައި ހުންނަ ހަކުރުގެ މިންވަރަށް ބައެއްފަހަރު މާބޮޑު ސަމާލުކަމެއް ނުދެވެއެވެ. މިސާލަކަށް ކޮކާ ކޯލާ ފުޅިއެއްގައި 39ގްރާމް ހަކުރު ހިމެނޭއިރު މިފަދަ ބުއިންތައް ވެގެންދަނީ ދުވާލަކު ކޮންމެވެސް އެއްގަޑިއެއްގައި އަހަރެމެން ބޭނުންކުރާ އެއްޗަކަށެވެ. މިފަދަ ބުއިންތަކުގެ ބަދަލުގައި އެންމެ ރަނގަޅީ ފެން ބުއިމަށް އާދަކުރުމެވެ. ނުވަތަ ފެނުގެ ތެރެއަށް ލުނބޯ ނުވަތަ އޮރެންޖް އަޅައިގެން ރަހަ ތަފާތުކޮށްލުމަކީވެސް ރަނގަޅު ގޮތެކެވެ. ދުވާލެއްގެ މައްޗަށް ބޮވޭ ފުޅިތަކާއި ދަޅުތަކުން އެކަތި މަދުކޮށްލެވުމަކީވެސް ހަކަރު ބޭނުންކުރެވޭ މިންވަރު މަދުކުރުމަށް އެޅުގެންދާނެ ރަނގަޅު ފިޔަވަޅަކަށް ވެގެންދާނެއެވެ.
ފޮނިކާއެއްޗިހި ތައްޔާރުކުރުމުގައި ހަކުރު ބޭނުންކުރާ މިންވަރު މަދުކުރުން
ފޮނި ބިސްކޯދާއި ތަފާތު ވައްތަރުގެ ކޭކުތަކަކީ މިހާރު އަހަރެމެން ގޭގައިވެސް އާންމުކޮށް ތައްޔާރުކުރާ އެއްޗިއްސެވެ. މިފަދަ އެއްޗިހި ތައްޔާރުކުރުމުގައި ވަކި ރެސިޕީއަކަށް ބެލިކަމުގައި ވީނަމަވެސް ޖުމްލަކޮށް މިތަކެއްޗަށް ހަކުރު އަޅާ މިންވަރު މަދުކޮށް ކަމުދާ މިންގަނޑަކަށް ރަހަ ބެހެއްޓިދާނެއެވެ. މިސާލަކަށް ދޮންކެޔޮ، ބެރީސް، ކަދުރު ފަދަ ތަކެއްޗަކީ ފޮނި އެއްޗިހި ތައްޔާރުކުރުމުގައި ބޭނުންކުރެވިދާން މޭވާތަކެވެ. ނަމަވެސް ހަކުރު މަދުކުރުމުން ގިނަ ފޮނި އެއްޗިހީގެ ޓެކްސްޗަރ އަށް ކޮންމެވެސް ވަރެއްގެ ބަދަލެއް އަންނާނެކަން ހަނދާނުގައި ބަހައްޓާށެވެ.
ތަރުކާރީ ފިހެގެން ބޭނުންކުރުން
އާވިން ކައްކައިގެން އަހަރުމެން ތައްޔާރުކުރާ ތަރުކާރީ އާންމު ގޮތެއްގައި ބޭނުންކުރެވެނީ ސޯސް ނުވަތަ ޑްރެސިންގ އަކާއި އެކުގައެވެ. މިއީވެސް ހަކުރު ހިމެނޭ ބާވަތްތަކެވެ. ވީމާ އާވިން ކެއްކުމުގެ ބަދަލުގައި ތަރުކާރީ އަވަނުގައި ފިހެގެން ބޭނުންކުރާށެވެ. މިގޮތަށް ފިހުމުން، ތަރުކާރީތަކުގައި ހުންނަ ހަކުރުގެ ބައިތައް ދިޔާވެ ފޮނި ރަހަލާ މިންވަރު އިތުރު ކޮށްދެއެވެ.
ހަކުރު ނުވަތަ ފޮނި ކާނާއަކީ އޭގެ ސަބަބުން އަހަރެމެންގެ މޫޑަށްވެސް ބަދަލުތައް ގެނުވާ އެއްޗަކަށް ވާއިރު މިފަދަ މުހިންމު ބާވަތެއް މުޅިން ކެއުން ހުއްޓާލައި ޑައެޓުން އުނިކޮށްލުމަކީވެސް ރަނގަޅު ކަމެއް ނޫނެވެ. ސަޔަށާއި ކޮފީގައި ހަކުރު ބޭނުންކުރާނަމަ، ހަކުރު އަޅާ މިންވަރު ކުޑަކޮށް މަދުކޮށްލާށޭވެ. އެމިންވަރުގައި ދުވަސްކޮޅަކު ހިފަހައްޓާލުމަށްފަހު އަނެއްކާވެސް އިތުރަށް މަދުކޮށްލައި، މި ގޮތަށް ރިޕީޓް ކުރަމުންދާށެވެ. އަހަރެމެންގެ ދުލާއި ހަށިގަނޑު މިރަހަތަކަށް އަންނަ ބަދަލުތަކަށް ހޭނުމަށް ވަގުތު ދެމުންދާށެވެ.
