ސޯޝަލް މީޑިއާ އާއި އިލެކްޓްރޯނިކް ވަސީލަތްތަކުގެ މިދުނިޔޭގައި ކުދިން ފޮތް ކިޔުމަށް ޝައިގުވެރިކުރުވުމަކީ ބެލެނިވެރިން ކިތަންމެ ބޭނުންވިޔަސް އުނދަގޫ ކަމެކެވެ. އެކަމަކު ފޮތް ކިޔުމުގެ މުހިންމުކަމާއި ފައިދާތަކަށް ބަލާއިރު މިއީ ކޮންމެހެންވެސް ކުރަންޖެހޭ ކަމެކެވެ. ޤަވާއިދުން ފޮތް ކިޔުމުން ކުދިންގެ ބަސްކޮށާރާއި ވިސްނުމުގެ ހުނަރާއި އަދި ކިޔެވުމުގެ ސްޕީޑް އިތުރުވެގެން ދެއެވެ. މީގެއިތުރުން ބުއްދިވެރި، ހިކްމަތްތެރި ނިންމުންތައް ނިންމުމުގެ ޤާބިލްކަން ކުދިންނަށް ލިބިގެންދެއެވެ. ވީމާ މިލިޔުމުގައި މިހިމަނާލަނީ ދަރިފުޅުގެ ކޮންމެ ދުވަހެއްގައިވެސް ފޮތް ކިޔުން ހިމަނައިލެވޭނެ ބައެއް އުކުޅުތަކެވެ.
1. ކުދިންނާއި އެކުގައި ފޮތް ކިޔުމުގައި ބައިވެރިވުން
ދަރިފުޅާއިއެކު ތިމާއަށް ކިޔާލެވޭނެ ފޮތްތައް އިޙްތިޔާރުކުރާށެވެ. މިއީ ދަރިފުޅާއި އޮންނަ ގުޅުން ބަދަހިވެ، ފޮތް ކިޔުމަކީ ކުޑަކުދިންނާއި ބޮޑެތި މީހުންނަށްވެސް ކަމުދާ މަޖާ ކަމެއްގެ ގޮތުގައި ދެކުމަށް ކުދިންނަށް ހިތްވަރު ލިބިގެންދާނެ ކަމެކެވެ.
2. ފޮތް ކިޔުމަށް ޙާއްސަ ޖާގައެއް ތައްޔާރުކުރުން
ގޭގައި ޙާއްސަ “ރީޑިންގް ކޯނަރ” އެއް ހުރުމަކީ ކުދިންގެ ހިތުގައި މިކަމަށް ޙާއްސަ ސަމާލުކަމެއް ދެވޭނެ ކަމެކެވެ. މިތަނަކީ ކުދިންނަށް އަރާމުގައި ފޮތް ކިޔަން ތިބެވޭނެ ގޮތަށް ގިނަ ބާލިހާއި ބްލެންކެޓްތަކާއި އެކުދިން ގަޔާވާ ފަދަ ތަކެތިން ޒީނަތްތެރި ކުރެވިފައިވާ ތަނަކަށް ހަދާށެވެ.
3. ފޮތް ކިޔުމަށް ވަކި ވަގުތެއް ކަނޑައެޅުން
ވަކި ވަގުތެއް ކަނޑައެޅިފައި ނުވާނަމަ، ފޮތް ކިޔުމަކީ ޝެޑިއުލްގެ ދަށަށް ވަރަށް ފަސޭހައިން ހިނގައިދާނެ ކަމެކެވެ. ވީމާ ކޮންމެ ދުވަހެއްގެވެސް ފޮތް ކިޔާ ގަޑި ވަކިކޮށް ކުދިންގެ ޝެޑިއުލްގެ ތެރެއިން މިވަގުތު އުނި ނުވާނެހެން އެހެން ކަންކަމަށްވެސް ވަގުތު ކަނޑައަޅާށެވެ.
4. ތަފާތު ފޮތް ކިޔުމަށް ކުދިންނަށް ހިތްވަރުދިނުން
ތަފާތު ވާހަކަ ފޮތްތަކުގެ އިތުރުން ޚަބަރުތަކާއި ބްލޮގްތަކާއި ވެބްސައިޓްތަށް ހިމެނޭގޮތަށް ކުދިންނަށް ކިޔުމަށް ފުރުސަތު ދިނުމަކީވެސް މުހިންމު ކަމެކެވެ. މިކަމުގެ ސަބަބުން ކުދިންގެ މައުލޫމާތު މުއްސަނދިވެ، ތަފާތު ބާވަތްތަކުގެ ބަހާއި ނަޒަރިއްޔާތަކަށް ކުދިން ހުށަހެޅިގެންދެއެވެ.
5. ކުދިންނަށް ކަމުދާ ފޮތްތަކަށް ސަމާލުކަންދިނުން
ކިޔެވުމަކީ މަޖާކަމަކަށް ވުމަކީ ކުއްޖާއަށް ކިޔުމަށް އެންމެ ބޮޑަށް ހިތްވަރު ދެވޭ އެއް ކަމަށެވެ. ކުދިން ކިޔާ ގިނަ ފޮތަތަކުން އެކުދިންނަށް ކަމުދާ ތަފާތު ފޮތްތަކަށް ސަމާލުކަންދިނުމުން ކުދިން ބޭނުންވާ ފަދަ ފޮތް އިޙްތިޔާރުކުރުމުގައި އެހީތެރިވެވޭނެއެވެ. މީގެއިތުރުން ފޮތް ގަތުމުގައިވެސް އަދި ލައިބްރަރީގައިވެސް ފޮތްތައް ނެގުމުނެ އިޙްތިޔާރު ކުދިންނަށް ދިނުމަކީވެސް ކުރެވިދާނެ ކަމެކެވެ.
ކޮންމެ ބެލެނިވެރިއަކަށްވެސް ފާހަގަވާނެ ފަދައިން ކުދިންނަށް ޤަވާއިދުން ކިޔެވުމަށް ހިތްވަރު ދިނުމަކީ ގޮންޖެހުންތަކެއް ހުރި ކަމެކެވެ. ދަރިފުޅަކީ ފޮތް ކިޔުމަށް ލޯބިކުރާ ކުއްޖަކަސް ވީނަމަވެސްމެއެވެ. އެއީ އެކުދިންގެ ވަގުތާއި ސަމާލުކަމަށް ވާދަކުރާ އެހެން ގިނަ ހަރަކާތްތަކާއި، ހޯމްވޯކާއި، ކުޅިވަރުތަކާއި ސްލީޕްއޯވާސްތައް އަބަދުވެސް ހިނގަމުންދާތީއެވެ. ވީމާ، ބެލެނިވެރިން މިކަމަށް ސަމާލުވެ ކުދިންނަށް މިކަމުގައި އެހީތެރިވުމަކީ އެކުދިން ބޮޑުވުމުންވެސް އާދައެއްގެ ގޮތުގައި ފޮތް ކިޔުން އިޙްތިޔާރުކުރާނެ ކަމެކެވެ.
