ރާއްޖޭގެ ޕްރައިވެޓް ކުންފުންޏެއް ކަމަށްވާ އަލްޓެކް ޓްރޭޑިން ޕްރައިވެޓް ލިމިޓެޑުން ސަރުކާރުގެ ކުންފުނި ފެނަކައަށް ވިއްކައިފައިވާ ތަކެއްޗަށް މިހާތަނަށް އައި އިރު ނުދައްކާ އޮތް 744،317 ރުފިޔާ 30 ދުވަހުގެ ތެރޭގައި ދެއްކުމަށް ސިވިލް ކޯޓުން ހުކުމްކޮށްފިއެވެ.
އަލްޓެކުން މި މައްސަލަ ސިވިލް ކޯޓަށް ހުށަހަޅައިފައިވަނީ ފެނަކައިން ދައްކަން ޖެހޭ ފައިސާ ދެއްކުން ލަސްވެފައިވާތީއެވެ. އަދި އެ ފައިސާ ދެއްކުން ލަސްވުމުން ކުންފުންޏަށް ދައްކަން ޖެހޭ ސާ ޗާޖާއި އެ ފައިސާ ހޯދުމަށް މައްސަލަ ކޯޓަށް ހުށަހެޅުމުން ވަކީލުންނަށް ކުރަން ޖެހުނު ޚަރަދު ވެސް ހޯދުމަށް އަލްޓެކުން ވަނީ ދައުވާ ކޮށްފައެވެ.
ފެނަކައާ ދެކޮޅަށް އުފުލާފައިވާ މި ދައުވާގެ އެއްބަޔަށް ފެނަކައިން ވަނީ އެއްބަސްވެފައެވެ. ފެނަކައިން ހާމަކޮށްފައިވާ ގޮތުގައި މިހާތަނަށް 29،416 ރުފިޔާ ވާނީ ދައްކާ ޚަލާސް ކޮށްފައެވެ. އަދި މިހާތަނަށް އައި އިރު ނުދެއްކި އޮންނާނީ 719،317 ރުފިޔާކަމަށް ފެނަކައިން ވަނީ އެއްބަސްވެފައެވެ.
ފައިސާ ދެއްކުން ލަސްވުމުގެ ސަބަބުން އަލްޓެކަށް ލިބުނު ގެއްލުމަށް 6.4 މިލިއަން ރުފިޔާ ސާޗާޖުގެ ގޮތުގައި ހޯދުމަށް އަލްޓެކުން ވަނީ ހުށަހަޅާފައެވެ. އަދި މި މައްސަލަ ޝަރީއަތަށް ގެންދިއުމަށް ޚަރަދުވި 25،000 ހޯދުމަށް ވެސް އަލްޓެކުން އެދިފައިވެއެވެ. ނަމަވެސް ސާޗާޖުގެ ވާހަކަ އެއްބަސްވުން ހެދި އިރު ގެނެސްފައި ނުވާތީ އެ ފައިސާ ނެގެން ނެތްކަމަށް ކޯޓުން ވަނީ ހާމަކޮށްފައެވެ.
އެހެންކަމުން މައްސަލަ ޝަރީއަތަށް ގެންދިއުމަށް ޚަރަދުވި 25،000 ރުފިޔާ ހިމެނޭހެން ފެނަކައަށް ދައްކަން އަމުރުކޮށްފައިވަނީ ޖުމުލަ 744،317 ރުފިޔާއެވެ.
