ފްކޯގެ ސީއީއޯ އަދި މެނޭޖިން ޑިރެކްޓަރުގެ މަގާމުން އިއްޔެ ވަކިކުރި އަހުމަދު ޝަމާހު ރަޝީދު ފިޝަރީޒް މިނިސްޓްރީގެ ސްޓޭޓް މިނިސްޓަރު ކަމަށް މިއަދު އައްޔަންކޮށްފިއެވެ.
މިފްކޯގެ ސީއީއޯކަމުގެ މަގާމު ފުރުއްވަމުން ގެންދެވި ސަމާހު ރަސްމީ ދަތުރުފުޅެއްގައި ރާއްޖެއިން ބޭރުގައި ހުންނަވަނިކޮށް، ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީބީ)ން ވަނީ އޭނާ އެ މަގާމުން ވަކިކުރުމަށް ނިންމާފައެވެ.
އެހެން ނަމަވެސް ސީއީއޯގެ މަގާމުން ސަމާހު ވަކިކުރިތާ، 24 ގަޑި އިރުވެސް ނުވަނީސް ފިޝަރީޒް މިނިސްޓްރީގެ ޑެޕިއުޓީ މިނިސްޓަރ ގެ މަގާމަށް މިއަދު ވަނީ ސަމާހު އައްޔަންކޮށްފައެވެ.
ފިޝަރީޒް މިނިސްޓްރީގެ ސްޓޭޓް މިނިސްޓަރު ކަމުގެ މަގާމަށް އައްޔަން ކޮށްފައިވާ ކަމުގެ ލިޔުން ރައީސް އޮފީހުން މިހާރު ވަނީ ޝަމާހު އަށް ފޮނުވައިފައެވެ.
މައުލޫމާތު ލިބޭގޮތުގައި މިފްކޯގެ ސީއީއޯގެ މަގާމުން ސަމާހު ވަކިކޮށްފައިވަނީ، އޭނާ އެހެން މަގާމަކަށް ބަދަލުކޮށްދިނުށް އަމިއްލައަށް އެދިގެންނެވެ.
ސަމާހު ވަކި ކުރި އިރު މީގެ މަހެއްހާ ދުވަސް ކުރިން ބޮޑެތި ތުހުމަތުތަކަކާ ގުޅިގެން ޕީސީބީން އޭނާ ސަސްޕެންޑް ވެސް ކުރިއެވެ.
އެގޮތުން ސަމާހުގެ މައްޗަށް ކުރެވޭ ބައެއް ތުހުމަތުތަކުގެ ތެރޭގައި، ކުންފުނީގެ މުދަލާއި ވަސީލަތްތައް އަމިއްލަ ބޭނުމުގައި އަދި ސިޔާސީ ބޭނުންތަކަށް ބޭނުންކުރުމާއި ކުންފުނީގެ ދާއިމީ މުވައްޒަފުން ނުހައްގުން ވަޒީފާގެ މަސްއޫލިއްޔަތުން ދުރުކުރުމާއި ވަޒީފާގެ ބިރު ދެއްކުމާއި ދާއިމީ މަގާމުތަކުގައި ތިބި މުވައްޒަފުން ވަޒީފާއާ ބެހޭ ގާނޫނާ ހިލާފަށް ސަބަބެއް ނެތި މަގާމާއި މުސާރަ ދަށްކުރުން އަދި އެހެން ޑިޕާޓްމަންޓްތަކާއި ރަށްތަކަށް ބަދަލުކުރުން ހިމެނެއެވެ.
މީގެ އިތުރުން ންފުނީގެ މުވައްޒަފުން ނެގުމާއި ގުޅޭގޮތުން ހަދާފައިވާ ޕޮލިސީތަކާއި މުސާރައިގެ އޮނިގަނޑާއި ހިލާފަށް ސަމާހު އާ އާއިލީ ގުޅުން ހުރި ފަރާތްތަކަށާއި ރައްޓެހިންނަށް ވަޒީފާ ދިނުމާއި، ޕީސީގެ ހުއްދަ ހޯދުމަކާ ނުލާ ކުންފުނީގެ މަގާމުތައް އުފައްދައި އެ މަގާމުތަކަށް މީހުން ނެގުމަކީވެސް ސަމާހުގެ މައްޗަށް ކުރެވުނު ބައެއް ތުހުމަތު ތަކެވެ.
